Erler tizimin tolyqtyrǵan eńbek

Mınsk qalasynda Qazaqstan Táýelsizdiginiń 25 jyldyǵy is-sharasy aıasynda Qazaqstannyń Belarýstegi elshiliginiń uıymdastyrýymen Belarýs Respýblıkasynyń Ulttyq kitaphanasynda ál-Farabı atyndaǵy Qazaq ulttyq ýnıversıtetiniń professory, tarıh ǵylymdarynyń doktory L.S.Ahmetovanyń «1941. Brest qamaly. Qazaqstan» atty kitabynyń avtordyń qatysýymen tusaýkeseri ótti. Tusaýkeserge Belarýs Respýb­lıkasy Ulttyq jınalysynyń de­pýtattary, saıasat jáne qoǵam qaı­rat­kerleri, sonyń ishinde Qa­zaqstannyń Dostar klýbynyń músheleri, akademııalyq toptar men qazaq dıasporasynyń ókil­de­ri, jergilikti tarıhshylar, jazýshy­lar men jýrnalıs­ter, sondaı-aq qazaqstandyq kýrsanttar qatysty. О́ziniń sózinde Qazaqstan­­nyń Belarýstegi elshisi E.Bólege­nov atalǵan eńbektiń Qazaqstan Tá­ýelsizdiginiń 25 jyldyǵy qarsańynda jaryq kórýiniń ny­shandyq máni bar ekenin aıtyp, L.Ahmetovanyń kita­by Uly Otan soǵysy tarıhyn zert­teýdegi «aqtańdaqtardy» joıý­ǵa úlken úles qosatyndyǵyn atap ótti. Soǵystyń asa aýyr bas­tapqy kezeńinde qaza tapqan san myńdaǵan qazaqstandyq­­tyń attary belgisiz bolyp keldi. Al ǵalymnyń jańa eńbegi kúni búginge deıin attary belgisiz Brest qamalyn qorǵaýshylardyń tizimin aıtarlyqtaı, ıaǵnı 556 qazaqstandyqqa tolyqtyryp otyrsa, olardyń jartysy – qazaqtar. Qamaldy qorǵaǵan bar­lyq 7 myń jaýyngerdiń shamamen 1 myńy Qazaqstannan shaqyrylǵandar bolyp tabylady. L.Ahmetovanyń kúsh-jigeri­niń arqasynda qazaqstandyq jaýyngerlerdiń kóp­shiliginiń attary belgili bolyp otyr. Olar­dyń arasynda iz-túzsiz ketkender de bar. Bizdiń elderimiz Eýrazııa­lyq ekonomıkalyq odaqqa birigip otyrǵan jaǵdaıda kitaptyń ózektiligi arta túsedi. Barlyq sóılegender, so­nyń ishinde Belarýs Ulttyq kitap­hanasynyń dırektory R.S.Matýlskıı, Belarýs Res­pýblıkasy MQK ardagerler keńesiniń tóraǵasy, polkov­nık A.P.Vasılev jáne bas­qalar Qazaqstan men Belarýs halyqtarynyń baýyrlas­­tyq tamyry tereńde ekenin atap kór­setip jatty. Al avtor tusaý­keserdi uıymdastyrǵan Qazaq­stannyń elshiligi men bar­lyq qatysýshylarǵa shynaıy al­ǵysyn bildirip, Belarýstiń kitaphanalary men kitap qor­laryna kitaptyń 200 danasyn syıǵa tartty. Is-shara aıasynda Ulttyq kitaphanada, sondaı-aq el­shi­lik tarapynan Qazaqstan Táýel­sizdiginiń 25 jyldyǵyna arnalǵan, qazirgi Qazaqstannyń je­tistikterin, sonymen birge Prezıdent N.Á.Nazarbaevtyń ıadroǵa qarsy bastamalaryn aı­shyqtaıtyn fotokórme uıym­dastyryldy. «Egemen-aqparat»