Keshe Prezıdent janyndaǵy Ortalyq kommýnıkasııalar qyzmetinde «Jekeshelendirýdiń ekinshi tolqynynyń» júzege asyrylý barysy týraly baspasóz máslıhaty ótti. Oǵan Qarjy mınıstrligi Memlekettik múlik jáne jekeshelendirý komıtetiniń tóraǵasy Edýard О́tepov, Respýblıkalyq menshik nysandaryn satý jáne jekeshelendirýden keıingi baqylaý basqarmasy basshysy Dáýletbaı Shaǵyrov, «Aqparattyq-esepteý ortalyǵy» AQ basqarma tóraǵasy Janasyl Ospanov qatysty. Olar jekeshelendirý jumystarynyń osy kezeńge deıingi nátıjelerin jarııalap, satylǵan nysandar týraly aqparattarmen bólisti.
2014-2016 jyldarǵa arnalǵan satý kestesine sáıkes satýǵa 622 nysan josparlanǵan. Al tamyzǵa deıingi kezeńde 523 nysandy jekeshelendirý josparlanǵan eken. Alaıda, 26 qyrkúıektegi jaǵdaı boıynsha is júzinde saýdaǵa 509 nysan shyǵarylyp, onyń 314-i satyldy.
«Onyń ishinde respýblıkalyq menshik boıynsha – 19, kommýnaldyq menshik boıynsha – 157, áleýmettik kásipkerlik korporasııalar boıynsha – 81, holdıngter boıynsha 57 nysan bar», dedi E.О́tepov. Bul rette satýdan túsken qarajattyń 7 mlrd teńgesi respýblıkalyq bıýdjetke, 5,1 mlrd teńgesi oblystyq bıýdjetterge, 68,1 mlrd teńgesi holdıngterge, 6,4 mlrd teńgesi áleýmettik kásipkerlik korporasııalarǵa quıyldy.
Respýblıkalyq menshik boıynsha 2014 jyldyń maýsymynan 2016 jyldyń qyrkúıegine deıingi kezeńde satýǵa 27 nysan josparlanǵan. Aǵymdaǵy jyldyń 28 qyrkúıegindegi jaǵdaı boıynsha saýda-sattyqqa 27 nysan shyǵarylyp, onyń 19-y satylǵan. Al kommýnaldyq menshik boıynsha 273 nysan jekeshelendirýge jatady. Is júzinde 28 qyrkúıektegi jaǵdaı boıynsha 254 nysan saýdaǵa shyǵarylyp, onyń ishinde 157 nysan satylǵan.
Áleýmettik-kásipkerlik korporasııalar boıynsha 105 nysan jekeshelendirýge jatady. Bul rette 104 nysan satýǵa qoıylyp, onyń 81-i satylyp ketken. Ulttyq kompanııalar men holdıngter boıynsha 28 qyrkúıektegi jaǵdaı boıynsha satýǵa josparlanǵan 136 nysannyń 124-i saýda-sattyqqa shyǵarylyp, onyń 57-si satylǵan.
Dınara BITIKOVA,
«Egemen Qazaqstan»