Qazaq rejısseri Satybaldy Narymbetovtiń «Amanat» fılmi «Shet tildegi úzdik fılm» nomınasııasy boıynsha «Oskarǵa» usynyldy. Bul týraly málimet Hollywood Reporter saıtyna shyqty.
Tarıhı drama repressııaǵa ushyraǵan tarıhshy Ermuhan Bekmahanovtyń taǵdyryna arnalǵan. Ermuhan Bekmahanov Kenesary Qasymov bastaǵan ult-azattyq qozǵalys jaıly ǵylymı tujyrymdamalar jasaǵan.
«Qazaqfılm» stýdııasynyń «Amanat» kartınasy 2016 jyldyń 19 mamyrynda prokatqa shyqqan bolatyn. Sıýjet boıynsha – úsh jeli men úsh keıipker – Kenesary, Ermuhan jáne Ramazan – árqaısysy oıdy ózdiginen jetkizgisi keledi. Satybaldy Narymbetovtiń aıtýyna qaraǵanda, ssenarısterdiń jobasy boıynsha, ótpeli jeli – ár keıipkerdiń ulttyń bostandyǵy men táýelsizdigine degen muraty. Basty keıipkerler Halımanyń rólin Qarlyǵash Muhamedjanova, Ermuhan Bekmahanovtyń rólin Berik Aıtjanov somdaǵan. Akterler Sanjar Mádıev pen Qarlyǵash Muhamedjanova baspasóz máslıhatynda túsirilim aldynda tarıhı derektermen tanysyp shyqqanyn aıtqan bolatyn.
Áıgerim Toqsanbek