Fılıppın prezıdenti Rodrıgo Dýterte óziniń esirtki saýdasyna qarsy júrgizip jatqan kúresin Holokostpen qatar qoıdy, kezinde Gıtler evreılerdi qalaı qyrsa, ózi nashaqorlardy solaı qyratynyn aıtty dep habarlaıdy BBC News-ke silteme jasaǵan Egemen-aqparat. «Gıtler úsh mıllıon evreıdi óltirdi. Bizde úsh mıllıon nashaqor bar. Colardyń kózin túgel qurtqym keledi» dep málimdegen Rodrıgo Dýterte. «Germanııada Gıtler bolsa, Fılıppınde...» dep ózin kórsetken.
Maýsym aıynda bılikke kelgen Fılıppın prezıdenti esirtki satýshylar men nashaqorlarǵa qarsy júrgizgen aıaýsyz kúresi úshin halyqaralyq qaýymdastyq pen Batys elderi lıderleri tarapynan synǵa ushyrap jatyr. Resmı málimetter boıynsha, maýsym aıynan beri polısııa júrgizgen túrli operasııalar kezinde 3000-nan asa adam óltirilgen. Olardyń deneleri men jasaǵan qylmystarynyń tizimi jurt aldyna qoıylady.
Dýterte Fılıppındegi qylmys deńgeıin tómendetý úshin 100 000 qylmyskerdi óltirýge daıyn ekenin ashyp aıtqan bolatyn.
Jergilikti basylymdardyń málimeti boıynsha, elde 1,8 mıllıonǵa jýyq nashaqor bar. Bul – el halqynyń 1,8%-yna teń.
Rodrıgo Dýterte jańaǵy sózdi ózi bir kezde basqarǵan Davao qalasyna kelgen kezde aıtqan.
Reıter agenttiginiń habaryna qaraǵanda, evreı qaýymy Dýterteniń bul sózderine narazylyq bildirdi.
Fılıppın prezıdenti munyń aldynda óziniń qatań saıasatyna eskertý jasaǵan batys elderin byt-shyt qylyp synaǵan bolatyn. «Taıaý Shyǵystan bosyp ketken mıgranttar júr. Olardyń qyrylyp jatqanyna bastaryń aýyrmaıdy. Endi 100, 2000, 3000 adamnyń ólgenine qalaısha qınala qaldyńdar?» degen edi ol sál burynyraqta.
Rodrıgo Dýterte bılikke kelgeli beri Fılıppınde birneshe myń adam sotsyz-tergeýsiz óltirildi
Egemen-aqparat