Astana ákimdiginde «Ardagerler uıymy» respýblıkalyq qoǵamdyq birlestigi Ortalyq keńesiniń II plenýmy ótti. Buǵan deıingi pleným otyrysynda «Ardagerler uıymy» respýblıkalyq qoǵamdyq birlestigi Ortalyq keńesiniń tóraǵasynyń mindetin atqarýshy laýazymyna Baqtyqoja Izmuhambetovtiń kandıdatýrasy usynylyp, ony Prezıdıým músheleri biraýyzdan maquldaǵan bolatyn.
Keshegi jıynnyń kún tártibinde tóralqa músheleri «Ardagerler uıymy» RQB tóraǵasynyń laýazymyna Baqtyqoja Salahatdınuly Izmuhambetovtiń kandıdatýrasyn biraýyzdan qoldady.
Sóıtip, Astana qalalyq «Qazaqstan Respýblıkasynyń ardagerler uıymy» RQB Ortalyq keńesiniń múshesi jáne tóraǵasy bolyp Parlament Májilisiniń depýtaty B.Izmuhambetov saılandy. Endi ol Májilis depýtaty bola júrip, Ardagerler keńesi tóraǵasynyń qyzmetin qosa atqarmaq. Al jaýapty hatshy qyzmetine K.Bekmaǵanbet saılansa, buǵan deıin ol qyzmetti atqaryp kelgen A.Rjavskıı óz erkimen jumystan bosatyldy. Jáne osyǵan deıin atalǵan keńestiń tóraǵalyq qyzmetin abyroıly atqarǵan О́mirzaq Ozǵanbaev «Ardagerler uıymy» respýblıkalyq qoǵamdyq birlestigi Ortalyq keńesi tóraǵasynyń birinshi orynbasary bolyp taǵaıyndaldy.
Jıyn barysynda ardagerlerdiń materıaldyq jáne áleýmettik turmys jaǵdaıy, medısınalyq, taǵy basqa da kómek túrlerin jaqsartý máselesi týraly usynys-pikirler qyzý talqyǵa tústi. Tıisinshe, ony sheshý joldary qarastyrylyp, aldaǵy ýaqytta ardagerlerge jeńildikter qarastyrylyp jatqany týraly da sóz boldy. О́z kezeginde ardagerler qaýymyna qoldaý kórsetip, uıymǵa demeýshilik jasap júrgen kásipkerlerge alǵys aıtyldy.
Qorytyndy nátıjesinde keńes músheleri men jıynǵa qatysýshylar uıym jumysyn qanaǵattanarlyq dep baǵalady. Aıta keteıik, pleným jumysyna Ortalyq Keńestiń 81 múshesinen bólek, tekserý komıssııasynyń 7 múshesi, túrli memlekettik organdardyń ókilderi men ardagerler qozǵalysynyń belsendileri qatysty.
Raýshan TÁÝIRHANQYZY
ASTANA