Elbasynyń Jarlyǵyna sáıkes, Ortalyq atqarýshy bılik basshylary men ákimder ǵana emes, ulttyq joǵary oqý oryndarynyń rektorlary da halyq aldynda atqarylǵan jumystarǵa baılanysty esep bere bastady. Bul tek esep qana emes, ony talqylap, suraqtarǵa naqty jaýap berilýi tıis. Oqytýshy-professorlarmen birge stýdentter de rektorǵa ózderin tolǵandyryp júrgen kókeıkesti máselelerge baılanysty saýaldaryn qoıýǵa múmkindik alady. L.N.Gýmılev atyndaǵy Eýrazııa ulttyq ýnıversıtetiniń rektory Erlan Sydyqovtyń halyq aldyndaǵy esebi osylaı órbidi.
2015-2016 oqý jylynda ulttyq ýnıversıtette atqarylǵan jumys aýqymdy. Qazir EUÝ – «QS Top 50 Under» reıtıngine engen Qazaqstan men TMD-daǵy jalǵyz joǵary oqý orny. Ashylǵanyna jarty ǵasyr tolmaǵan álemniń 100 ýnıversıteti arasynda 37-orynda. Bul – óte joǵary kórsetkish.
«QS World University Ranking 2016» reıtınginde álemniń 916 úzdik ýnıversıteti arasynda Eýrazııa ulttyq ýnıversıteti 345-shi orynǵa kóterilip otyr. Bul – Baýman atyndaǵy Máskeý joǵary tehnıkalyq ýnıversıtetimen, Reseı halyqtar dostyǵy ýnıversıtetimen bir qatarda tur degen sóz. Joǵary oqý oryndary vebsaıttarynyń álemdik «Webometrics» reıtınginde Qazaqstan boıynsha eki jyl qatarynan birinshi oryndy ıelendi. 2015 jyly Academic University Ranking Performance reıtıngi boıynsha «Azııanyń úzdik 550 ýnıversıteti» qataryna Ortalyq Azııadan engen jalǵyz joǵary oqý orny.
Qazirgi ýaqyt ınnovasııanyń zamany. Osyǵan saı mamandar óz elimizde daıarlanýy tıis. Elbasy usynǵan ındýstrııalyq-ınnovasııalyq damý baǵdarlamasynyń maqsaty – bilikti, básekege qabiletti mamandar daıarlaý. Osy baǵdarlamaǵa sáıkes 2015 jyldan bastap ýnıversıtettiń magıstratýrasynda «Qurylys materıaldary, buıymdar men konstrýksııalar óndirisi», «Ǵaryshtyq tehnıka men tehnologııalar» mamandyqtary boıynsha mamandar daıarlanýda. Bıyl buǵan úsh mamandyq qosylǵan: «Bıotehnologııa», «Radıotehnıka, elektronıka jáne telekommýnıkasııa», «Jylý energetıkasy». Bul qazirgi ýaqytta aýadaı qajet mamandyqtar.
Ýnıversıtet rektory, baıandamadan tys, stýdenttiń saýalyna oraı taǵy bir jaǵymdy jańalyqty jetkizdi. Baıqońyr ǵarysh aılaǵy Qazaqstannyń aýmaǵynda bola tura onda ýnıversıtet stýdentteriniń óndiristik tájirıbeden ótýine múmkindik bolmaǵan. Osy máseleniń túıini bıyl sheshilgen. Taǵy bir úlken jańalyq – eki-úsh jyldyń shamasynda ýnıversıtet óziniń jer serigin ushyrmaq. Qazirgi zamanǵy tehnologııa boıynsha jumys isteıtin qurylysy aıaqtalýǵa jaqyn jańa kitaphana táýlik boıy qyzmet kórsetetin bolady. Munyń bári ýnıversıtettiń aýmaǵyndaǵy nysandar.
Sheteldiń aıtýly joǵary oqý oryndarymen ulttyq ýnıversıtettiń halyqaralyq baılanysy jyldan-jylǵa artyp kele jatqanyna kýá boldyq. Máselen, ótken jyly stýdentterge dáris oqý men ǵylymı jumystaryna jetekshilik etýge 72 sheteldik professor shaqyrylǵan. 326 stýdent AQSh pen Germanııanyń, Fransııa men Koreıanyń, Japonııa men Polshanyń jáne Qytaıdyń joǵary oqý oryndarynda bilim alǵan. Al, osy elderdiń jastary Eýrazııa ulttyq ýnıversıtetinde oqyp júr. О́tken jyly 25 shet elden 486 stýdent oqyǵan. Búginde 277 pán shet tilinde júrgiziledi eken. Shetel stýdentteri úshin bıyldan bastap qazaq jáne orys tilderin oqytý kýrstary ashylmaq.
Rektor mynadaı bir derek keltirdi: Kembrıdj ýnıversıtetiniń málimetine qaraǵanda, osy irgeli oqý ornynyń magıstratýrasynda Qazaqstan men Ortalyq Azııadan baryp oqyp jatqandardyń eń kóbi Eýrazııa ulttyq ýnıversıtetiniń túlekteri eken. Demek, bul oqý ordasynyń bedeli men mereıi Qazaqstanda ǵana emes, shetelde de ústem ekendigi osydan-aq baıqalady.
Ýnıversıtet ujymy «EKSPO» halyqaralyq kórmesine jan-jaqty ázirlik jasap jatqan kórinedi. Rektordyń ózi «EKSPO-2017» halyqaralyq kórmesi janyndaǵy qoǵamdyq keńestiń tóraǵasy.Sondyqtan bolsa kerek, «ENU JUNIOR-EXPO-2017» atty jańa aksııany jarııa etti. Onyń bul bastamasyna oqytýshy-professorlar da, stýdentter de úlken qoldaý bildirdi. Halyqaralyq kórmeniń jumysyna 3000-nan astam erikti stýdent qatyspaq. Ulttyq ýnıversıtet otandyq energetıka, ekologııa, bıotehnologııa, týrızm salalaryna baılanysty semınar, sımpozıým, dóńgelek ústelder uıymdastyrýdy josparlap otyr. Qyzmetkerler men stýdentter «EKSPO-2017» usynady» sapa belgisin ázirleýge qatysyp, aǵylshyn, qytaı, túrik tilderin meńgergen gıdter men ekskýrsııa jetekshilerin daıarlaý ortalyǵyn ashpaq.
Rektordyń esebin talqylaý men suraq-jaýap kezinde kóterilgen ózekti máseleniń biri – jataqhana. Ýnıversıtet jetekshisi osy jyldyń sońyna qaraı, Táýelsizdik merekesine oraı 500 oryndyq jańa jataqhananyń paıdalanýǵa beriletinin aıtyp, bir qýantyp tastady.
Ǵalym OMARHAN,
«Egemen Qazaqstan»