Ustaz bolý – júrektiń batyrlyǵy,
Ustaz bolý – sezimniń aqyndyǵy,
Ustaz bolý – minezdiń kún shýaǵy,
Azbaıtuǵyn adamnyń altyndyǵy, – dep jyrlaǵan Qazaqstannyń Halyq jazýshysy, kórnekti aqyn Ǵafý Qaıyrbekov atyndaǵy №2 mektep-gımnazııanyń 50 jyldyq mereıtoıyna arnalǵan «Ashyq esik kúni» ótti. El Táýelsizdiginiń 25 jyldyǵymen tuspa-tus kelgen saltanatty jıynǵa elordadaǵy atalǵan bilim ordasynyń ardager ustazdary, ár jyldary mektep bitirýshi túlekter jáne alystan at arytyp kelgen arnaıy qonaqtar qatysty.
Aıta keteıik, atalǵan bilim ordasy tuńǵysh ret Oktıabrdiń 50 jyldyǵy atyndaǵy №2 orta mektep degen ataýmen 1966 jyly ashylǵan bolatyn. Mekteptiń tuńǵysh dırektory Mıhaıl Gavrılovıch Kýznesov boldy. Ol muǵalimderdi usynys boıynsha jáne konkýrstyq negizde qabyldaǵan. Al 2001 jyly orta mektepke mektep-gımnazııa mártebesi, sonymen qatar qabyrǵaly aqyn Ǵafý Qaıyrbekov esimi berildi. Sodan bergi ýaqytta árbir muǵalimniń sabaǵy, synyptan tys jumystary, synyp saǵattary Ǵafý Qaıyrbekov shyǵarmalarymen tyǵyz baılanysta ótkizilip, aqynnyń ómir jolymen tanysý dástúrge aınalǵan.
Kesh shymyldyǵy №2 mektep-gımnazııanyń dırektory Gamıl Shaımerdınovtiń quttyqtaý sózinen bastaý aldy. Sodan soń ardager ustazdar qaýymy ózderiniń súıikti mektepterine degen jyly lebizderin bildirip, qyzyqty estelikterimen bólisti. Ardager ustazdar mektep qabyrǵasynda ótkizgen árbir kúnderin saǵyna eske aldy.
Shara sheńberinde, kelgen qonaqtar 2002 jyly mektep ishinen ashylǵan Ǵafý Qaıyrbekov murajaıyna at basyn burdy. Murajaıdyń ishi aǵamyzdyń kózi tirisinde kádesine jaratqan dúnıelerimen jabdyqtalǵan. Aqynnyń qoldanǵan zattary: ústel, oryndyq, radıoqabyldaǵysh, qalamdary, kózildirigi, shyrpy men kúlsalǵyshy, t.b. qoıylypty. Kezinde ózi ustaǵan papkasy men qoljazbalary da ótken kúnderden syr shertedi. Osy zattardy kózdiń qarashyǵyndaı saqtap, murajaıǵa tapsyrǵan Ǵafý Qaıyrbekovtiń jubaıy Bádesh Hamzaqyzyna alǵystaryn bildirgen mektep ujymy aqyn ómiri men shyǵarmashylyǵyna toqtalyp, mekteptiń búgingi tynys-tirshiligi jaıly biraz jańalyqtan habardar etti. Kórkem shyǵarmalaryn, qundy jádigerlerin qasterlep, baǵalaı biletin urpaǵy bar Ǵafý aqyn máńgi jasaı bermek.
Sodan soń 11 synyp oqýshylary daıyndaǵan «Ustaz – mektep júregi» atty tárbıe saǵaty tamashalandy. Sabaq barysynda konserttik nómirler, ınteraktıvti oıyndar jáne qonaqtarǵa shaǵyn estelik syılyqtar tabys etildi. Merekelik jıyn sońy oqýshylar men kásipqoı ártisterdiń («Naz» bı toby, ánshi Bahtııar Omarov jáne Astana qalasy О́ner ýnıversıtetiniń tarlandary) qatysýymen qoıylǵan konserttik baǵdarlamaǵa ulasty. Mereke sońynda mektep tarıhy jaıly jýrnal men gúl shoqtary syıǵa tartyldy. Osylaısha áserli ótken mekteptiń 50 jyldyq mereıtoıy qatysýshylardyń esinde uzaq saqtalary sózsiz.
Raýshan TÁÝIRHANQYZY,
jýrnalıst