Elordada Mańǵystaý oblysynyń mádenı kúnderi ótedi

Oblys ákiminiń orynbasary Baný Nurǵazıevanyń aıtýynsha, aımaqtyń áleýmettik-ekonomıkalyq tynys-tirshi­li­gin jaqsartý úshin atqarylyp jat­qan jumystar az emes. Qolǵa alynǵan baǵdarlamalar birin­shi kezekte, halyqty jumys­pen qamtýǵa, jańa jumys oryndaryn qurýǵa baǵyt­ta­lyp jatyr eken. Jurtyn ju­myspen qamtyp, eki qolǵa bir kúrek taýyp berip otyrǵan iri kásip­oryndardyń jumysyn jandandyrý úshin olarǵa tıisti jaǵdaı jasaýǵa da kóńil bólinedi. Sonyń arqasynda jyl basynan beri aımaqta 17 837 ja­ńa jumys orny qurylypty. Memlekettik baǵdarlamalardy aıtpaǵanda, 2015 jyly oblys­ta «Jańa serpin» atty óńirlik baǵdarlama qabyldanyp, jas­tardy kásiptik oqytý isi jolǵa qoıylǵan eken. – Qazir osy jumystardyń nátıjesin kórip otyrmyz. Máselen, Jańaózen qalasynyń, Beıneý, Jetibaı, Munaıshy aýdandarynyń jastary Aqtaý­daǵy kásiporyndarǵa jumysqa ornalasty. «Kaspıo plast», «Aqtaý soltústik teńiz termınaly» syndy kompanııalardyń tapsyrysymen kóptegen adamdar óndiriske aralasty. Olardyń áleýmettik jaǵdaıyn jasaý úshin Aqtaý qalasynda, Quryq aýylynda árqaısysy 500 oryndyq 2 jataqhana salyndy. Fort-Shevchenko qala­synda da jataqhana salýdy jos­parlap otyrmyz, – dedi Baıan Nurǵazıeva. Qazirgi tańda oblysta bi­lim berý salasy nysandary kóptep salynyp jatqanyn aıta ketý kerek. Sońǵy bes jyl ishinde balabaqsha sany 245-ke jetkeni, apatty jaǵdaıdaǵy mektepter men úsh aýysymda oqy­tatyn mektepterdiń qal­maǵany osynyń dáleli. 2016 jyly bilim berý salasyn da­mytý úshin 48 mıllıard, den­saý­lyq saqtaý salasy úshin 21 mıl­­lıard teńge qarjy bóli­nipti. Elordadaǵy mádenı kún­derin ótkizýge oblystyń óner ujymdary úlken daı­yn­dyqpen kelgeni baıqalady. Mádenı-rýhanı baǵdar­la­ma­lardyń arasynda qazaqtyń qa­byrǵaly qalamgeri Ábish Kekil­baevtyń muralaryn nasıhat­taýǵa arnalǵan sharalardyń orny bólek. Atap aıtar bolsaq, Beıbitshilik jáne kelisim saraıynda ótetin kórmeniń «Uly dala abyzy» atty arna­ıy bóliminde qalamgerdiń ómiri men shyǵarmashylyǵynan syr shertetin ekspozısııalar qoıy­lady. Sondaı-aq, 1 qazan kúni Ulttyq akademııalyq kitap­ha­nada «Ábish álemi» atty jýr­naldyń tusaýy kesilmek. M.Gorkıı atyndaǵy Memleket­tik akademııalyq orys drama teatrynda Ábish Kekil­baev shyǵarmasynyń jelisimen sahnalanǵan «Shyńyraý» dramasy qoıylatynyn da aıta ketken jón. Apta saıyn elordada ár aımaqtyń aýylsharýashylyq taýar­laryn óndirýshiler jár­meńke uıymdastyryp júrgeni belgili. Bul naýqannan mań­ǵys­taýlyqtar da shet qalmaq emes. 1-2 qazan kúnderi «Han Sha­tyr» saýda, oıyn-saýyq orta­lyǵynyń aldynda shubat, balyq syndy óńirdiń brendine aınalǵan basty ónimderin elordalyqtarǵa usynady. Arnur ASQAR, «Egemen Qazaqstan»