Búgin Astanada Saǵadat Nurmaǵambetov atyndaǵy «Jas Ulan» respýblıkalyq áskerı mektebine jańadan qabyldanǵan 62 ulan ant berdi. Ortaǵa Kók baıraǵymyz ákelinip, ile Ánuran shyrqalǵannan keıin oqýshylardyń ant qabyldaý rásimi bastaldy. Jıyn barysynda áskerı mektep basshysy, polkovnık Muhtar Maıkeev: «1999 jyldyń 4 qarashasynda resmı túrde ashylǵan «Jas Ulan» respýblıkalyq áskerı mektebi – elimizdiń Qarýly Kúshteri salasyna qyzmet etýdi maqsat etken jetkinshekterdi tárbıeleýde ózindik orny bar bilim oshaǵy. Qurylǵaly bergi 17 jyldyń ishinde 700-den astam jas túlekti tárbıelep shyǵarǵan mekteptiń tusaýyn Elbasynyń ózi keskeni, sondaı-aq, bilim uıasyna Keńes Odaǵynyń Batyry, Halyq Qaharmany, qazaq halqynyń aty ańyzǵa aınalǵan batyry, armııa generaly Saǵadat Nurmaǵambetovtyń esimi berilýi bizdiń ujymǵa úlken jaýapkershilik júkteıdi. Mine, ózderińiz kýá bolyp otyrǵandaı, mektebimizge bıyl qabyldanǵan 62 oqýshy ant qabyldaý ústinde. Bul sharanyń mańyzy óte zor», dedi. Shara kezinde mekteptegi 4-oqý rotasynyń komandıri, aǵa leıtenant Marat Beısenbekov: «Mektebimizde ulandarǵa otansúıgishtik tárbıe berý barysynda áskerı patrıottyq tárbıege, Elbasy usynǵan «Máńgilik El» ıdeıasyn túsindirýge basymdyqtar beriledi. Sondaı-aq, ulandarǵa ar-namys, adamgershilik, adamnyń quqyqtary men bostandyǵyn syılaý qaǵıdattaryn úıretýge basa nazar aýdarylady», dedi. Ant qabyldaý rásimi aıaqtalǵan soń Qorǵanys mınıstrliginiń ókilderi, ardagerler, ustazdar men ata-analar sóz sóılep, jas ulandarǵa tabys tilep, parasatty sózderin arnady. Joldybaı BAZAR