Qyrkúıektiń 20-sy kúni «IWF» Halyqaralyq aýyr atletıka federasııasy atqarýshy komıtetiniń otyrysy ótti. Otyrys barysynda Beıjiń men London Olımpıadasynda dopıng qoldandy degen aıyppen sporttan shettetilgen sportshylardyń taǵdyrlary talqyǵa salyndy, – dep habarlaıdy baq.kz portaly.
Qazaqstan aýyr atletıka federasııasynyń bas hatshysy Omar Mustafınniń aıtýynsha, Qazaqstan quramasy osy jyldyń aıaǵyna deıin barlyq úlken jarystarǵa qatysý múmkindikterinen aıyrylmady. Aldaǵy ýaqytta qazaq aýyr atletterin eki iri týrnır kútip tur. Biri – Malaızııada qazan aıynda ótetin jastar arasyndaǵy álem chempıonaty bolsa, ekinshisi – jastar arasyndaǵy Tokıodaǵy Azııa chempıonaty.
Qazan aıynyń 18 kúni Halyqaralyq Olımpıada komıtetiniń tártiptik keńesi dopıng qoldandy degen aıyp taǵylǵan qazaqstandyq sportshylarǵa – Ilıa Ilınge, Maıa Manezaǵa, Chınshanlo men Podobedovaǵa naqty sheshim shyǵarady.
Sonymen qatar Omar Mustafın eger aýyr atletshilerge taǵylǵan aıyptyń barlyǵy rastalǵan jaǵdaıda qandaı jaza qoldanylatyny jóninde de aıtty.
Halyqaralyq Olımpıada komıtetiniń tártiptik keńesiniń quzyretine sáıkes sportshylar jetistikterinen aıyrylady nemese sol qalpynda qalady. Eger komıssııa aıypty dep tapsa, sportshylar medaldarynan aıyrylady. Odan bólek keńes qosymsha jazalaý is-sharalaryn qarastyrmaıdy.