Fınlıandııa – saıası jáne ekonomıkalyq seriktesimiz

Májilis Tóraǵasy Nurlan Nyǵmatýlın Fınlıandııanyń Qazaqstandaǵy Tótenshe jáne ókiletti elshisi Ilkka Raısanendi qabyldady, dep habarlady osy palatanyń baspasóz qyzmeti. Taraptar ekijaqty qarym-qa­tynasty, sonyń ishinde, par­la­mentaralyq únqatysýdy nyǵaıtý máselelerin talqylady. Májilis Tóraǵasy atalǵan kezdesýdiń eki memlekettiń tarıhı kezeńimen sáıkes kelip otyrǵanyna nazar aýdardy. Iаǵnı, bıyl Qazaqstannyń Táýelsizdik alǵanyna 25 jyl tolsa, keler jyly Fınlıandııa táýelsizdigine – 100 jyl. Májilis Tóraǵasy atap ótkendeı, Fınlıandııa – Qazaqstannyń barlyq deńgeıde syndarly únqatysýǵa qol jetkizgen syrtqy saıası jáne eko­no­mıkalyq áriptesi. О́tken jyly eki­jaqty taýar aınalymy 467 mln AQSh dollaryn qurady. Odan ári Májilis Tóraǵasy: – Ult josparyn jáne eń damyǵan 30 eldiń qataryna kirý jolyndaǵy aýqymdy sharalardy júzege asyrý barysynda ınnovasııalyq damýdy zańnamalyq qamtamasyz etý, bilim júıesin jetildirý, aqparattyq-kommýnıkasııalyq tehnologııalardy, ǵylymı jáne isker ortanyń yntymaqtastyq tetikterin damytý máselelerinde fındik áriptesterimizdiń tájirıbesine qyzyǵýshylyq joǵary, – dedi. Qazan aıynda Májilis delegasııasy Fınlıandııaǵa resmı saparmen barady dep josparlanǵan. N.Nyǵmatýlın Helsınkıde ótetin bul kezdesýdiń mańyzdy salalar boıynsha ekijaqty ózara is-qımyldy odan ári nyǵaıtýǵa yqpal etetinine senim bildirdi.