El Táýelsizdiginiń 25 jyldyǵyna oraı Qazaqstannyń eńbek sińirgen qaıratkeri Asqar Bóribaevtyń basshylyǵymen Abaı atyndaǵy Memlekettik akademııalyq opera jáne balet teatry Grekııa astanasy Afınada óner kórsetti. Qatarynda jergilikti qoǵam jáne saıası qaıratkerler, dıplomatııalyq korpýs, iskerlik jáne óner ókilderi jáne burynǵy qazaqstandyq-otandastar bar kórermenge Grekııanyń eń úzdik óner saraılarynyń biri – «Pallas Teatrynda» «Uly Dala ańyzdary» qoıylymy, sondaı-aq N.Rımskıı-Korsakovtyń «Shaherezadasy» usynyldy.
Qazaqstan Respýblıkasynyń Grekııadaǵy Tótenshe jáne ókiletti elshisi A.Volkov gastroldik sapardyń ashylý saltanatynda «...Qazaq teatry sahnasynda túrli jyldarda memleketimizdiń, sondaı-aq shetel opera jáne balet óneri juldyzdary, ataqty Galına Ýlanova, Kúlásh Baıseıitova, Bıbigúl Tólegenova, Ermek Serkebaev syndy maıtalmandar óz ónerlerin pash etken bolatyn» dep aıryqsha atap ótti.
Qoıylym sońynda qonaqtar alǵan áserlerimen bólisip, ártisterge zor qoshemet kórsetti. Abaı atyndaǵy Memlekettik akademııalyq opera jáne balet teatrynyń gastroli 4 qazan kúni Grekııanyń mádenıet oshaǵy sanalatyn Patra qalasynda jalǵasyn tapty. Munda jergilikti ónersúıer qaýym nazaryna qazaq jáne álem klassıkteriniń shyǵarmalary boıynsha erekshe joba tartý etildi.
«Egemen-aqparat»