Kókshetaýdyń «Táýelsizdik» alańy men ortalyq ýnıvermag alańynda dástúrli kúzgi jármeńke ashyldy. Onyń jumysyna Býrabaı, Zerendi, Sandyqtaý, Shortandy aýdandary men Arshaly aýdanyndaǵy «Ijevskıı» óndiristik kooperatıvi, Aqkól aýdanyndaǵy «Úsh bulaq», Eńbekshilder aýdanyndaǵy «QazGerQus», Selınograd aýdanyndaǵy «CapitalProjectLtd» jaýapkershiligi shekteýli seriktestikteriniń aýyl sharýashylyǵy taýar óndirýshileri qatysty.
Qala turǵyndaryn Aqmola oblysynyń ákimi Sergeı Kýlagın quttyqtap, el-jurtqa dastarqan baılyǵyn tiledi.
Oblystyq aýyl sharýashylyǵy basqarmasynyń málimeti boıynsha, jármeńkede 114 mıllıon teńgeniń 57 túrli jergilikti azyq-túlik taýary qoljetimdi baǵamen satylǵan. Saýda alańdaryna 66 tonna et jáne shujyq ónimderi, 13 tonna balyq, 250 myń danadan astam jumyrtqa, 21 myń tonna sút pen sút ónimderi, 22 tonna un, 80 tonna kartop 73 tonna kókónis, 10 tonnaǵa jýyq jarma, 5 tonna qant pen 10 myń lıtr ósimdik maıy jetkizildi.
Merekelik sıpattaǵy jármeńkede aýdan kórkemónerpazdarynyń konsertteri qoıylyp, mádenı-kópshilik sharalar uıymdastyryldy.
Baqbergen AMALBEK,
«Egemen Qazaqstan»
Aqmola oblysy