«Serpin» senim syılady

Almaty, Jambyl, Qyzylorda, Mańǵystaý jáne Ontústik Qazaq­stan oblystarynda demografııalyq ósim óte joǵary. Aýa raıy jumsaq ońtústik óńirge syrt jaqtan qonys aýdaratyndar sany da jetkilikti. Bul úderis kúrdeli máseleni kóldeneń tartady. Búginde ońtústik oblystar­da jumyssyzdyq máselesi beleń al­ǵan. Áleýmettik nysandar, baspana, mektep, balabaqsha jetpeıdi. Atalmysh óńirdegi joǵary oqý ornyn bitirgen mamandardyń deni jumyssyz júrgeni jasyryn emes. Jumys orny bolmaǵan soń, memlekettik granttar da az bóline bastady. Al buǵan kerisinshe, elimiz­diń 8 oblysynda kadr tapshylyǵy ózekti máselege aınaldy. Oǵan sol óńirlerdegi bala týý deńgeıiniń tómen­digi jáne syrtqa kóshetinder legi­niń toqtamaýy sebep bolyp otyr. «Máńgilik El jastary – ındýstrııaǵa!» atty áleýmettik joba osy úlken istiń sheshimin tabýǵa degen talpynystan týdy. Memlekettik baǵdarlama aıasynda qajetti mamandarǵa jaǵdaı jasalyp, olardyń tegin oqýy úshin memlekettik granttar bólindi. Osy áleýmettik jobaǵa bıyl taǵy da 24 joǵary oqý orny men 30 kolledj qatysyp otyr. Endi jastarǵa medısına salasy boıyn­sha mamandyq alýǵa múmkindik týdy. Y.Altynsarın atyndaǵy Arqa­lyq memlekettik pedagogıkalyq ıns­tı­týtyna «Máńgilik El jastary – ındýstrııaǵa», «Serpin-2050» áleý­mettik jobalary boıynsha bıyl 155 talapker qabyldandy. Barlyǵy da jataq­hanalarmen, arnaıy mólsherdegi shákirt­aqymen qamtamasyz etilgen. Qazaq­stannyń erteńindeı búgingi jas­tar sapaly bilim alyp, tańdaǵan maman­dyqtarynyń ıesi bolýdy armandaıdy. Olar elden, ata-ana, baýyrdan jyraq kettik dep muńaıyp júrgen joq. Demek, qanatyn endi ǵana qaqqan, jarqyn bolashaqqa jańa serpinmen umtylǵan jastarǵa durys jol nusqap, bolashaqqa jón silteý – óz tarapymyzdan elimizge tıer az da bolsa úles dep oılaımyn. Ekonomıkalyq daǵdarysqa qaramastan, memleket bizdiń bolashaǵymyz úshin qarajat bólgenine myń alǵys. «Serpin» qozǵalysynyń múshesi bolýǵa árqaı­symyz at salysýymyz qajet. Bizben qatarlas bolý árkimniń-aq armanyna aınalmaq. San emes sapa mańyzdy bol­ǵandyqtan barlyǵymyz aıanbaı jumys atqarýǵa mindettimiz. Osy jobaǵa qa­tys­­qan jastardyń bilimge degen qush­tarlyǵy oıandy. Bolashaq búginnen bastalady. Al biz aldyńǵy urpaq senim artar jalyndy jastarmyz. Elim, jerim deıtin jigerli jastar legi kóbeıe bersin! Janserik BAIDENOV, Y.Altynsarın atyndaǵy Arqalyq memlekettik pedagogıkalyq ınstıtýtynyń II kýrs stýdenti Qostanaı oblysy