Kásiptik-tehnıkalyq kolledjde oqıtyn shardaralyq azamat eńbek dodasynda eshkimge esesin jibermedi
Ońtústik Qazaqstan oblysy, Shardara aýdanyndaǵy №16 kolledjdiń II kýrs stýdenti Janarys Taýbaı Bilim jáne ǵylym mınıstrligi uıymdastyrýymen Astanada ótken «Worldskills Kazakhstan – 2016» ulttyq chempıonatynda II oryndy ıelendi. Jumysshy kásipteriniń bedelin arttyrý, jastardy tehnıkalyq jáne kásiptik bilimmen qamtýdy keńeıtý maqsatynda qolǵa alynǵan jobaǵa elimizdegi 135 kásiptik bilim berý mekemesinen úmitkerler qatysqan bolatyn. 15 mamandyq boıynsha ózara synǵa túsken jastardyń kásibı deńgeıine sheteldik sheberler men iri kásiporyndaǵy bilikti mamandardan quralǵan qazylar alqasy ádil de laıyqty baǵasyn berdi.
Eske sala keteıik, Janarys Taýbaı buǵan deıin oblystyq dodada áriptesterinen oq boıy ozyq kóringen bolatyn. Kolledjde qurylysshy mamandyǵy boıynsha bilim alyp jatqan Janarysty Astana qalasynda ótken baıqaýǵa top sheberi Súndetýlla Mamaseripov pen dırektordyń óndiristik oqytý jumystary jónindegi orynbasary Ábdirahman Momynov alyp bardy. Bir aptaǵa sozylǵan ulttyq chempıonatta túlekter ózderine júktelgen mindetterdi múltiksiz oryndaýǵa tyrysyp baqty. «Qurǵaq qurylys jáne sylaq jumystary» boıynsha synǵa túsken Janarys osy konkýrstaǵy 4 satydan turatyn baıqaý sharttarynyń barlyǵyn óz deńgeıinde oryndady, ıaǵnı elementterdiń karkasyn jınap, ony gıpsokartonmen qaptaı otyryp, sylaq jumysyn sheberlikpen jasaı bildi. Erkin taqyryp boıynsha qabyrǵaǵa jasalǵan raýshan gúlderiniń alleıasy da kásibı mamandardyń nazaryn ózine aýdartty. Nátıjesinde qazylar alqasy shardaralyq úmitkerdiń eńbegine joǵary baǵa berip, mártebeli júldemen marapattady.
Jasyratyny joq, budan burynǵy baıqaýlarda bul júlde kóbine ózge etnos ókilderiniń qanjyǵasynda ketetin. Janarystyń jeńisi bizge bul túsiniktiń áldeqashan eskirgen uǵym ekenin dáleldedi. О́ıtkeni, qazir baıaǵydaı aýyl balalarynyń jappaı joǵary oqý ornyna túsýge jarysy tyıylǵan. Sol úshin de aýyl jastary tarapynan etikshi, montershi, dánekerleýshi, aǵash ustasy, t.s.s qazaq jastary úshin tyń sanalǵan salalardy, búginde qoǵamǵa asa qajetti mamandyqtardy meńgerýge umtylys jıi baıqalady.
Ulttyq chempıonattyń qorytyndysynda Janarys Taýbaı men ustazy Súndetýlla Mamaseripovke arnaıy sertıfıkat tabys etildi. «KNAUF» nemis fırmasy aqshalaı-zattaı syılyq berdi. Túrkııanyń «Tiko» fırmasynyń ókilderi aldaǵy ýaqytta Janarys pen onyń ustazyna ózderinde bir aptalyq tájirıbe almasýǵa arnaıy shaqyrtý beretin boldy.
Ádil ÁBDIRAMANOV
Ońtústik Qazaqstan oblysy,
Shardara qalasy