El Táýelsizdiginiń 25 jyldyǵyna oraılastyrylǵan «Qýatty óńirler – Qýatty Qazaqstan» aksııasynyń aıasynda elordada óńirler kúnderiniń uıymdastyrylýy osy aptada da jalǵasýda. Bul jolǵy kezek – Qostanaı jáne Ońtústik Qazaqstan oblystarynda.
Senbi-jeksenbi kúnderi Astanadaǵy jármeńkeniń biri ádettegideı qala ákimdiginiń aldyndaǵy alańda uıymdastyrylady. «Qazaqstanda jasalǵan» dep atalatyn aýylsharýashylyq jármeńkesiniń kórigin bul kúnderi Astanaǵa altyn dánin arqalap kelgen qostanaılyqtar qyzdyrmaq. Onda oblystyń jetekshi óndirýshileriniń joǵary sapaly ekologııalyq taza ónimderi usynylatyn bolady. 2 kún boıyna oblystyń 14 aýdany men 3 qalasynyń 74 kásiporny 360 tonna kóleminde 100-den astam ónim túrin satady. Sonyń ishinde maldyń barlyq túrinen 53 tonna et, 180 tonna kartop pen kókónis, 14 tonna sút ónimderi, 10 tonna shujyq ónimderi men jartylaı fabrıkat, 15 tonna jarma men makaron ónimderi, 13 tonna nan-toqash jáne kondıter ónimderi, 250 myń dana jumyrtqa, 45 tonna un bar. Barlyq taýarlar Astana qalasynyń bazarlarynda qalyptasqan ortasha baǵalardan tómen qun boıynsha usynylady.
Qostanaı oblysynyń kúnderine oraı keshe Astanadaǵy Ortalyq kommýnıkasııalar qyzmetinde arnaıy baspasóz máslıhat ótti. Oǵan Qostanaı oblysy ákimdiginiń ókilderi qatysyp, óńirdiń Táýelsizdik jyldarynda jetken jetistikterimen bólisti.
Máselen, oblys ákiminiń orynbasary Sergeı Karplıýktiń habarlaýynsha, Táýelsizdik jyldary Qostanaı oblysy joǵary kórsetkishterge qol jetkizdi. Atap aıtqanda, agrarlyq jáne ónerkásiptik sektorda, turǵyn úı qurylysy jáne áleýmettik salalardaǵy jetistikteri aýyz toltyryp aıtarlyqtaı.
«25 jylda 4,5 mln sharshy metr turǵyn úı paıdalanýǵa berildi. Aldaǵy 2 jyldyń ishinde 90 myń sharshy metr alańymen 21 úı salynatyn bolady. Sonymen qosa, Táýelsizdik jyldary oblystyń bilim berý jáne densaýlyq saqtaý salasynyń bıýdjeti 15 ese, mádenıettiń bıýdjeti 9 ese jáne sport boıynsha 63 ese ósti», dedi S.Karplıýk. Al óz kezeginde aýyl sharýashylyǵy basqarmasynyń basshysy Baıbosyn Mýrzın oblystyń agroónerkásiptik keshen damýynyń oń serpinin, 25 jyl ishinde aýyl sharýashylyǵynyń jalpy óniminiń kólemi 332 mlrd teńgege jetkenin, bıylǵy jylǵy egindi qosqanda 106 mln tonnadan astam astyq jınalǵandyǵyn atap ótti. Aǵymdaǵy jyly 400 jańa jumys ornyn asha otyryp, jalpy somasy 7 mlrd teńgege 24 ınvestısııalyq jobany paıdalanýǵa berý josparlanyp otyr eken. Olardyń eń iri degen 4-eýi aýyl sharýashylyǵy salasynda júzege asyrylatyny aıtyldy.
Baspaóz máslıhatynda sondaı-aq, oblystyń mádınet basqarmasynyń basshysy Erlan Qalmaqov Astanada ótetin Qostanaı oblysy kúnderi aıasynda uıymdastyralatyn mádenı sharalar týraly aıtyp berdi. Jármeńkeden basqa astanalyqtar óńirdiń mádenı murasymen tanysyp, rýhanı azyq alady.
Dınara BITIKOVA,
«Egemen Qazaqstan»