M.Tynyshbaev atyndaǵy Qazaq kólik jáne kommýnıkasııa akademııasynyń qurylǵanyna bıyl 85 jyl toldy.
Otandyq kólik jáne toraptyq qyzmet kórsetý salasynyń bilikti mamandaryn daıarlaıtyn oqý orny elimizdegi mańdaıaldy bilim shańyraǵy sanatynda. Salalyq bilim beretin elýden astam joǵary oqý ornynyń arasyndaǵy reıtıng boıynsha toǵyzynshy oryndy ıelenetin akademııa, qazirgi kezde Bolon júıesi boıynsha 3 satyly bilim berýge kóshken. Aımaqtarda arnaýly mamandyqtar boıynsha oqytatyn 5 kolledj jumys jasaıdy.
Akademııanyń qara shańyraǵynda dóńgelek ústel ótti. Mereıtoılyq baǵdarlamalar aıasynda uıymdastyrylǵan «Eýrazııalyq ekonomıkalyq odaq sheńberinde kólik salasyndaǵy bilim berý men ǵylymnyń damý keleshegi» atty sharaǵa otandyq kólik salasynyń bilgirleri men Reseı, Ulybrıtanııa, Avstrııa elderinen kelgen mamandar qatysty.
Dóńgelek ústelde M.Tynyshbaev atyndaǵy Qazaq kólik jáne kommýnıkasııa akademııasynyń rektory Baqytjan Qýanyshev kólik salasy mamandaryn daıarlaýdaǵy ozyq ádistemeler men máseleler týraly aıtyp, álem elderiniń tájirıbesin qoldanýdaǵy erekshelikterge toqtaldy. Al «Qazaqstan temir joly» ulttyq kompanııasy tehnıkalyq saıasat jáne retteý departamentiniń dırektory Talǵat Qanatbaev akademııa men ulttyq kompanııa arasyndaǵy tyǵyz baılanystyń temir jol mamandaryn oqytýda óz jemisin berip otyrǵandyǵyn sóz etip, osy tájirıbeni EAEO elderiniń bilim berý isine qoldanýdy usyndy.
Kólik salasynyń mamandaryn daıarlaýdaǵy qazaqstandyq tájirıbeniń ozyq tustaryn máskeýlik ǵalym, Imperator 2-Nıkolaı atyndaǵy jol-kólik ınstıtýtynyń birinshi prorektory Valentın Vınogradov ta atap kórsetti. 120 jyldyq tarıhy bar Máskeýdegi bilim ordasy qazir aımaqtaǵy ǵana emes, álemdegi sala mamandaryn oqytyp, daıarlaýdaǵy kóshbasshy orynda.
Jalpy, kólik salasynyń damýy bilikti mamandardyń qolynda ekeni talas týdyrmaıdy. Memleketterdiń ekonomıkasy da negizinen kóliktik tasymaldaý men logıstıkaǵa arqa súıep otyr. Ásirese, TMD elderi arasyndaǵy ishki baılanys pen syrtqy tasymal aınalymynda temir joldyń alatyn orny mańyzdy. Demek, kólik salasyn basqarý men damytýǵa da jańasha kózqaras, ǵylymǵa negizdelgen tyń qadamdar qajet. Bul – EAEO elderi úshin de, Eýropa úshin de kún tártibindegi másele.
Dóńgelek ústelde sóz alǵan aǵylshyn ǵalymy, Ulybrıtanııa kólik jáne logıstıka ınstıtýty halyqaralyq baılanystar departamentiniń dırektory Djon Harrıs, «QazJol» ǵylymı-zertteý ınstıtýtynyń prezıdenti Baǵdat Teltaev jáne avstrııalyq «Fraýsher Sensortehnık» kompanııasynyń TMD boıynsha atqarýshy dırektory Ýve Gıýnter kólik salasyndaǵy bilim berý men ǵylymnyń kókjıegin keńeıtýge qatysty oılarymen bólisti.
Qalmahanbet MUQAMETQALI,
«Egemen Qazaqstan»
ALMATY