Rım Olımpıada ótkizýden bas tartty
Italııa Olımpııalyq komıteti Rımde 2024 jylǵy Olımpııa oıyndaryn ótkizý jónindegi ótinimin qaıtyp aldy. Bul týraly keshe komıtet basshysy Djovannı Malago arnaıy málimdedi.
«Men búgin Halyqaralyq olımpııalyq komıtetke hat joldap, 2024 jylǵy Olımpııalyq oıyndardy ótkizý quqyǵyn alý jónindegi ótinimimizden bas tartyp, bul jónindegi kandıdatýramyzdy alatynymyzdy habarladym» – dedi Malago.
Úmitkerlerdiń arasynda qazir Parıj, Býdapesht jáne Los-Andjeles qalalary ǵana qalyp tur.
FIFA fýtbolǵa 4 mlrd dollar bóledi
Halyqaralyq fýtbol federasııasy (FIFA) aldaǵy on jylda fýtboldy damytý úshin 211 ulttyq assosıasııaǵa $4 mıllıard mólsherinde qarjy bóledi. Bul jaıynda keshe osy uıymnyń keńesinde aıtyldy.
Munyń ózi halyqaralyq federasııanyń tıimdi kúshti ınstıtýt qurý maqsatynda fýtboldy utymdy damytý úshin jasap shyǵarǵan «FIFA 2.0: Bolashaqqa kózqaras» atty «jol kartasynyń» arqasynda múmkin bolyp otyr. Osyǵan oraı ulttyq assosıasııalar basqarý men baqylaýǵa beriletin kómek – ınvestısııalar retinde jylda 100 mln dollarǵa jýyq aqsha alyp turatyn bolady. On jyldyń ishinde sondaı-aq, áıelder fýtbolyn yntalandyryp, damytýǵa 315 mln dollar bólinedi.
Armenııa quramasy bas bapkersiz qaldy
Fýtboldan Qazaqstan quramasynyń irikteý tobyndaǵy básekelesi – Armenııa komandasynyń bas jattyqtyrýshysy Varýjan Sýkıasıan otstavkaǵa ketti. Ol óz shákirtteri Varshavada Polshadan utylǵannan keıin osyndaı sheshim qabyldady.
V.Sýkıasıan qurama tizginin 2015 jyldyń jeltoqsan aıynda alǵan edi. Onyń basqarýynda jasaq 2018 jylǵy álem chempıonaty irikteý týrnıri aıasynda úsh match ótkizip, bárinde de jeńilis tapty. Sonyń ishinde Danııaǵa 0:1, Rýmynııaǵa 0:5, Polshaǵa 1:2 esepterimen ese jiberdi.
Krıýkov – Azııa federasııasynyń vıse-prezıdenti
Qazaqstan Ulttyq olımpııalyq komıtetiniń vıse-prezıdenti Andreı Krıýkov Dohada ótken Azııa sýda júzý federasııasynyń (AASF) 12-shi kongresinde kezekti márte osy uıymnyń vıse-prezıdenti bolyp bekitildi.
Munymen qatar, ol tórt jyldyq merzimge Halyqaralyq sýda júzý federasııasynyń (FINA) múshesi bolyp saılandy. Munda bıyl Rıo-de-Janeırodaǵy Olımpııalyq oıyndarda qazaqstandyq sýda júzýshi Dmıtrıı Balandınniń chempıon atanýynyń da belgili bir dárejede áseri boldy.
«Egemen-aqparat»