О́skemende Bolat О́temuratovtyń «Asyl Mıras» qaıyrymdylyq qory aýtızmmen aýyratyn balalarǵa arnalǵan ortalyqty paıdalanýǵa berdi. Bul – atalǵan qordyń «Aýtızm. Barshamyzǵa bir álem» baǵdarlamasy aıasynda ashqan tórtinshi ortalyǵy. Aýtızmi bar balalar men olardyń otbasyna kómek kórsetýge arnalǵan kópsalaly ortalyqtar jelisi byltyr Astana men Almaty qalalarynda ashylǵan bolatyn. Bıyl Qyzylorda men О́skemen qalalarynda iske qosylyp otyr.
Ortalyqtyń ashylý saltanatynda oblys ákiminiń orynbasary Nurymbet Saqtaǵanov qor jetekshiligine óńir basshylyǵy atynan alǵys aıtyp, jańa nysannyń óńir úshin úlken kómegi tıetinin atap ótti.
– Bizdiń oblysta 14 myńnan astam bala aýtızmmen aýyrady. Olarǵa arnalǵan 12 mektep-ınternat, 4 mektepke deıingi mekeme, 12 korreksııalyq synyp jáne 3 medısınalyq ortalyq jumys isteıdi. Osy oraıda jańa ortalyq aýtızmmen aýyratyn balalar men olardyń otbasylarynyń ómir sapasyn jaqsartýǵa septigin tıgizedi dep oılaımyn, – dedi N.Saqtaǵanov.
«Asyl Mıras» ortalyǵynda bir balaǵa arnalǵan ońaltý kýrsy 5,5 aıǵa eseptelgen. Qor ortalyǵy aýtızmdi túzeýdiń eki tásiline negizdelgen baǵdarlama boıynsha jumys isteıdi. Birinshi – klassıkalyq tásilde balanyń áleýmettik-kommýnıkatıvtik jáne aǵartýshylyq saladaǵy, tildik jáne kúndelikti ómirdegi daǵdylaryn anyqtaý qarastyrylady. Sábılermen bir mezette psıholog, defektolog, logoped jáne áleýmettik pedagog jumys isteıdi.
Jumystyń ekinshi ádisi – «ABA terapııa». Bul minez-qulyq daǵdylarynyń tildik jáne bazalyq baǵalaýlaryna qaraı qurylady. Munda ár balaǵa jeke pedagog qarastyrylady jáne 544 daǵdyǵa negizdelgen jeke baǵdarlama bekitiledi. Aýtızmi bar bala osy baǵdarlamany meńgerip shyǵýy kerek.
– Biz aýtızmge dýshar bolǵan balalardy áleýmettik turǵydan beıimdeýge jáne olardyń tolyqqandy ómirin qalyptastyrýǵa kómekteskimiz keledi. Qordyń maqsaty – elimizdi álemdik deńgeıdegi ońaltý baǵdarlamasymen qamtamasyz etý. Sondyqtan ońaltý salasy boıynsha álemdik deńgeıdegi jetekshi mamandarmen jumys isteýdemiz. Bizge kún saıyn sondaı balalardyń ata-analary habarlasyp jatady. Qazirgi kezde «Asyl Mırastyń» úsh ortalyǵyna 1530 otbasy kómek surap keldi, 827 bala dıagnostıkanyń birneshe kezeńinen ótti. 567 bala psıhologııalyq-pedagogıkalyq ońaltý baǵdarlamasyna engizildi. О́skemen qalasyndaǵy jańa ortalyqty qosa alǵanda, «Aýtızm. Barshamyzǵa bir álem» baǵdarlamalar jelisi aǵymdaǵy jyldyń sońyna deıin 478 bala men olardyń otbasylary eń zamanaýı ońaltý, túzetý jáne konsýltasııalyq kómekter alatyn bolady», – deıdi «Asyl Mıras» qorynyń dırektory Marat Aıtmaǵambetov.
Aıta ketken abzal, qordyń barlyq ortalyqtary tegin qyzmet kórsetedi. Ár ortalyqta otyzdan astam maman jumys isteıdi. О́skemen qalasyndaǵy ortalyq mamandary qajetti kýrstar men trenıngterden ótken. Sondaı-aq olar aldaǵy ýaqytta respýblıka kóleminde óz tájirıbelerimen bólisetin bolady.
Jalpy, aýtızmi bar balaǵa mamandar men qoǵamnyń kómegi aýadaı qajet. Sondyqtan qor baǵdarlamasy aýtızmi bar balalarǵa qatysty qoǵamdyq pikirdi ózgertýge kómektesedi.
Dýman ANASh,
«Egemen Qazaqstan»
О́SKEMEN