Memlekettik hatshy Gúlshara Ábdiqalyqova Ǵ.Músirepov atyndaǵy Qazaq memlekettik akademııalyq balalar men jasóspirimder teatryna quttyqtaý hat joldady, dep habarlady Prezıdenttiń baspasóz qyzmeti.
Onda bylaı delingen: «Qurmetti teatr ujymy! Sizderdi qazaq sahna ónerinde ózindik baı tarıhy qalyptasqan Ǵ.Músirepov atyndaǵy Qazaq memlekettik akademııalyq balalar men jasóspirimder teatrynyń qurylǵanyna 70 jyl tolǵan mereıtoıymen shyn júrekten quttyqtaımyn!
Elimizdiń irgeli rýhanı ortalyqtarynyń biri retinde jasampaz halqymyzdyń jáne jas urpaqtyń boıyna ulttyq qundylyqtardy sińirip, tarıhı sanany jańǵyrtyp, ónerdi órge súırep kele jatqan bul teatrdyń otandyq mádenıettiń máýe jaıýyna qosqan úlesi qomaqty dep bilemin.
О́ziniń 70 jyldyq belesinde balalar men jasóspirimder teatry dáripti dástúrin qalyptastyryp, talantty qalamgerlerdiń kórnekti shyǵarmalaryn sahnalap, jurtshylyqtyń yqylasy men qurmetine bólengen nebir dúldúl daryndar men daraboz sańlaqtardyń kıeli shańyraǵyna aınaldy.
Ujymdyq óner sanalatyn teatrda búginde shyǵarmashylyq quramnan bastap tehnıkalyq qyzmetkerlerge deıingi 200-den astam adam bir qoldyń salasyndaı birlese qyzmet etip, ulttyq sahnany mazmundyq jaǵynan jańa jetistikterge jeteleýde.
Aldaǵy ýaqytta da mártebelerińiz bıik, mereılerińiz ústem bolyp, Elbasymyz Nursultan Ábishuly Nazarbaev belgilep bergen «Máńgilik El» jalpyulttyq patrıottyq ıdeıasynyń qundylyǵyn sahna óneri arqyly halyqtyń sanasyna sińirýge qoltańbalaryńyzdy qaldyra beretinderińizge senimdimin».
Memlekettik hatshy quttyqtaýynyń sońynda balalar men jasóspirimder teatryn Qazaqstannyń mádenı ómirindegi jarqyn jańalyq, eleýli beles – búgingi mereıtoılarymen quttyqtaı otyryp, ujym múshelerine zor densaýlyq, otbasylaryna baqyt, shyǵarmashylyq tabys tileıdi.