Aqmola oblysy boıynsha memlekettik kiris qyzmetkerleriniń jedel-izdestirý sharalary barysynda jol júrý erejesin buzǵany úshin paıdalanylatyn túbirtekterdi qoldan jasap, saýda aınalymyna shyǵarǵan qylmystyq top quryqtaldy. Tergeý-jedel toby is-shara barysynda mundaı oqıǵanyń 56 ret kórinis bergenin anyqtady, dep habarlaıdy departamenttiń baspasóz qyzmeti.
Atalǵan túbirtekter grafıkalyq redaktor baǵdarlamasyn paıdalana otyryp, kompıýterde daıyndalǵan. Onyń elektrondyq nusqasy kópsalaly prınterde basylyp shyǵarylypty. Qylmyskerler bul ispen jaldamaly birneshe páterde aınalysqan. Departamenttiń ekonomıkalyq qylmyspen kúres qyzmetkerleri osy toptyń múshesi M-ny saýdany qyzdyryp jatqan jerinen ustaǵan. Tintý barysynda daıyn túbirtekter men uıymdastyrý tehnıkasy tárkilendi.
Anyqtalǵan qylmystyq áreketterdiń saldarynan memleket bıýdjetine 1 mıllıon 358 myń 238 teńgeniń ákimshilik aıyppuly túspeı qalǵan.
Sot úkimimen qylmystyq toptyń músheleri QK 385-babynyń 2-bólimine sáıkes aıypty dep tanyldy. Sondaı-aq, jeńil «kómekke» júginip, álgi túbirtekterdi paıdalanǵan kisilerdiń ústinen de qylmystyq is qozǵaldy. Qazirgi kúni sot aldyndaǵy tergeý jumystary júrgizilýde.
Baqbergen AMALBEK,
«Egemen Qazaqstan»
Aqmola oblysy