Astananyń Qýyrshaq teatry Barselona men Parıjde ótken Halyqaralyq qýyrshaq karnavalynyń kezdesýlerine qatysty.
Álemniń 54 memleketinen jınalǵan úzdik teatrlyq ujymdar ózara tájirıbe almasyp, ónerdiń osy túrin damytý máselelerin talqylady. Is-sharalar barysynda Astana qalasy Qýyrshaq teatrynyń dırektory Toǵjan Hasanǵalıeva «Planshetti qýyrshaqtar» taqyrybynda baıandama jasady.
Planshetti qýyrshaqtar degenimiz – sahna tóseminiń ústinen «júre» alatyn qýyrshaqtar. Qazirgi kezde óner áleminde bul uǵym keńinen tanymal ári álemniń úzdik teatrlary naq osy planshetti qýyrshaqtarmen jumys isteıdi. Elordalyq qýyrshaq oınatýshy ártister de olardy óz qoıylymdarynda qoldanyp keledi.
Ispanııa men Fransııanyń iri mádenı qalalarynda ótken Halyqaralyq qýyrshaq karnavalynyń sheberlik-sabaqtarynda elordalyq ártister ulttyq stılde jasalǵan ústel planshetti qýyrshaqtarmen óner kórsetip, sheteldik áriptesteriniń nazaryna «Qańbaq shal» halyq ertegisin usyndy. Halyqaralyq karnavaldyń kezdesýlerine qatysqan sheteldik úzdik qýyrshaq oınatýshy ártister Astana Qýyrshaq teatry ártisteriniń shyǵarmashylyǵy men kásipqoılyǵyn joǵary baǵalaǵany da bir ǵanıbet.
Aıgúl SEIILOVA,
«Egemen Qazaqstan»