Halyq arasynda «Pıramıda» atalyp ketken Beıbitshilik jáne kelisim saraıynyń ashylǵanyna 10 jyl boldy. Atalǵan ǵımarat elimizdegi dostyqtyń, birlik pen beıbitshiliktiń belgisi ispetti.
Beıbitshilik jáne kelisim saraıy týraly ıdeıa Elbasy Nursultan Nazarbaevqa tıesili. Memleket basshysy bul ıdeıa týraly 2003 jyly Álemdik jáne dástúrli dinder kóshbasshylarynyń tuńǵysh sezinde aıtqan edi. Sóıtip, ekinshi sezd Pıramıdada ótkizildi. Saraıdyń ashylý saltanatynda álemdik opera ánshisi Monserrat Kabaleniń sahnada óner kórsetkeni de el esinde. Beıbitshilikti temirqazyq etken saraıda konfessııaaralyq forým ótkizilip, onyń jumysyna Dúnıejúzilik Islam Lıgasynyń Bas hatshysy Sheıh At-Túrkı, Orys pravoslavıe shirkeýiniń Patrıarhy Aleksıı II, Izraıldiń Bas ashkenazıı ravvıni Iona Mesger jáne basqa da kóptegen dinı kóshbasshylar qatysty.
Beıbitshilik jáne kelisim saraıynda jyl saıyn aýqymdy sharalar, sonyń ishinde ónerdiń shyńy sanalatyn opera ánshileriniń konserti, sırek kezdesetin óner týyndylarynyń kórmeleri uıymdastyrylady. Atalǵan orda Astananyń mádenıetin damytýǵa ózindik úles qosyp keledi dep tolyq aıtýǵa bolady.
Taǵy bir tilge tıek eter jaıt, Beıbitshilik jáne kelisim saraıynda Túrki álemi ǵylymı mekemelerin úılestirip, kóptegen zertteý jobalaryn júzege asyryp otyrǵan Halyqaralyq Túrki akademııasy, tanymal túrkologtardyń ondaǵan myń kitaby men qoljazbalary saqtalǵan Túrki akademııasynyń kitaphanasy men mýzeıi, Qazaqstan halqy Assambleıasynyń etnomádenı birlestikteri, «Qulanshy» qazirgi zamanǵy óner ortalyǵy, Halyqaralyq mádenıet jáne din ortalyǵy ornalasqan.
Beıbitshilik jáne kelisim saraıynyń avtory – belgili brıtandyq sáýletshi Norman Robert Foster. Sýretshi Braıan Klarktyń naǵyz óner týyndysy – Qazaqstan jerinde turatyn ulttar men ulystardy bildiretin 130 kógershin beınelengen vıtraj Pıramıdanyń usharbasynyń kórkin keltirip tur. Ǵımarattyń jyljymaly qańqasy jergilikti klımatty eskere otyryp jasalǵan, al lıftter 60 gradýs kólbeý dıagonalmen qozǵalady, mundaı lıftter Eıfel munarasynda jáne Las-Vegasta «Lıýksor» qonaq úıinde ǵana bar.
Mereıtoıǵa arnalǵan gala-konsert «Pyramid Dance Group» shyǵarmashylyq bı tobynyń jarqyn mıýzıklimen ashyldy. Pıramıdanyń qurylysy týraly teatrlandyrylǵan qoıylym men onyń qyzmeti týraly úzindiler kórermender nazaryna usynyldy. Etnomádenı birlestikterdiń kórkemónerpazdary sharaǵa qatysyp, óz ónerlerin ortaǵa salady.
Nurlybek Dosybaı,
«Egemen Qazaqstan»