QR densaýlyq saqtaý jáne áleýmettik damý mınıstri Tamara Dúısenova Premer-Mınıstr Baqytjan Saǵyntaevtyń tóraǵalyǵymen ótip jatqan Úkimet otyrysy kezinde «Jumyspen qamtýdyń jol kartasy-2020» baǵdarlamasy aıasynda aýyldardaǵy jumyspen qamtý barysy týraly esep berdi dep habarlaıdy Premer-mınıstrdiń resmı saıty.
Mınıstrdiń málimetine sáıkes, 2011 jyldan beri 41,6 myń adam shaǵyn nesıe alsa, onyń ishinde 27,2 myń adam kásipker atanǵan. Shaǵyn nesıe alǵandar 38,5 myń qosymsha jumys oryndaryn ashty.
T. Dúısenova bıyl shaǵyn nesıelendirý úsh sulba boıynsha júrgizilip jatqanyn habarlady:
- baǵdarlama qatysýshysy óz kapıtalymen nemese bar taýarymen aımaqtarda qurylǵan aýyl sharýashylyǵy kooperatıvterine kiredi;
- «Aýylda jumyspen qamtý» jobasyn júzege asyrý boıynsha «Nur Otan» partııasymen birikken joba. Joba bes oblysta pılottyq rejımde júzege asyrylyp jatyr. Jobanyń maqsaty - jeke qosalqy sharýashylyq bazasynda usaq taýarly óndiristi qurý. Sondaı-aq, shaǵyn nesıe somasy 6 mln teńgege deıin arttyrylǵan.
- kásipkerlik kartasyna sáıkes, shaǵyn nesıe 3 mln teńgege deıingi kólemde beriledi.
«Osy maqsattarǵa bıyl 30,8 mlrd teńge qarastyrylǵan. Osy qarajat esebinen bıyl 9,1 myń adam shaǵyn nesıe alyp, aýyldyq jerlerde shamamen 12 myń jumys ornyn ashady», - dep aqparattandyrdy mınıstrlik basshysy.
QR DSÁDM málimetterine sáıkes, búginde 6,4 myńnan astam adamǵa shaǵyn nesıe berilgen, onyń ishinde shamamen 4 myń adam alǵash ret óz isin ashqan. Nesıe alǵandardyń barlyǵynyń ishinen 5 myńnan astamy ózin-ózi jumyspen qamtyǵandar, qalǵandary – jumyssyzdar.
«Shaǵyn nesıe alǵan azamattardyń ishinen 89%-y nesıeni aýyl sharýashylyǵy salasyna, 6% - qyzmet kórsetý salasyna, 3% - ónimdi qaıta óńdeýge, 2 % - basqa da salalarǵa paıdalanǵan», - dedi T. Dúısenova.