Ult josparyn júzege asyrý aıasynda jasalǵan probasııa týraly jańa zań quqyq buzýshylar úshin sotqa deıingi jáne penıtensıarlyq probasııany engizedi, dep málimdedi QR ishki ister mınıstri Qalmuhanbet Qasymov QR Úkimeti otyrysynda. Bul týraly Premer-Mınıstrdiń resmı saıt habarlady.
Q. Qasymov «Probasııa týraly» jáne «Qazaqstan Respýblıkasynyń keıbir zańnamalyq aktilerine probasııa máselesi boıynsha ózgerister men tolyqtyrýlar engizý týraly» zańdardyń jobalary týraly baıandady.
Mınıstr habarlaǵandaı, probasııa qyzmetiniń esebinde turǵan tulǵalarǵa áleýmettik-quqyqtyq kómek kórsetýdiń derbes baǵdarlamasy jeke tulǵany jáne onyń ómirlik jaǵdaıyn keshendi zerdeleýge negizdelip, jergilikti atqarýshy organdardyń, uıymdar men azamattardyń tarapynan kórsetiletin sharalar keshenin qamtıtyn bolady.
«Penıtensıarlyq probasııa qyzmetiniń negizine bosatylý kezeńinde mamandyq alýdy uıymdastyrý, eńbek daǵdysyn ıgerý, qujattaryn qalpyna keltirý, eńbek jáne turmystyq jaǵdaıyn josparlaý tárizdi parametrler alyndy», - dedi Q. Qasymov.
Mınıstr atap ótkendeı, probasııanyń eki úlgisi bolǵan jaǵdaıda, tek bir jyldyń nátıjeleriniń ózi jańa qylmystardyń aldyn alýda aıtarlyqtaı tıimdiligin kórsetti.
«Elimizdiń qylmystyq zańyn álemdik tájirıbemen oraılastyrý úshin quqyq buzýshylarǵa qylmystyq-quqyqtyq yqpal etýdi arttyrý salasyn keńeıtý maqsatynda 2012 jyldan beri qoldanysta bolyp kele jatqan úkimdik jáne penıtensıarlyqtan keıingi kezeńdermen qatar sotqa deıingi jáne penıtensıarlyq probasııa engiziledi», - dep naqtylady Q. Qasymov.
Sotqa deıingi probasııa kezeńinde júrgizilip jatqan jumystar nátıjeleri boıynsha probasııa qyzmeti baıandama jazatyn bolady, onda kúdiktiniń jeke basynyń erekshelikteri týraly sotqa arnalǵan aqparat, sáıkes sharalardyń oryndalýy nemese olardy oryndaýǵa degen umtylysy qamtylady. Sot bas bostandyǵynan aıyrý týraly úkim shyǵarǵan jaǵdaıda probasııanyń kelesi úlgisi – penıtensıarlyq probasııa qoldanysqa engiziledi.
IIM basshysy atap ótkendeı, Ult jospary – bes ınstıtýttyq reformany júzege asyrý boıynsha 100 naqty qadamnyń 33 qadamyn oryndaý maqsatynda QR IIM ázirlegen zań jobasyn qabyldaýdyń maqsaty qylmystyq sot tóreligin áleýmettendirý áleýetin keńeıtý, qylmystyq saıasatty odan ári izgilendirý bolyp tabylady.