Aldaǵy demalys kúnderi M.Áýezov atyndaǵy Qazaq memlekettik akademııalyq drama teatrynda eki kún qatarynan «Aqtastaǵy Ahıko» dramasynyń premerasy bolady. Teatrdyń jańa maýsymyn taǵatsyzdana kútken ónesúıer qaýym daryndy akter Dýlyǵa Aqmoldamen sony ról arqyly qaýyshpaq.
Jańa qoıylym týraly búgin ótken baspasóz máslıhatynda teatr dırektory Erlan Bilál, teatrdyń kórkemdik jetekshisi Asanáli Áshimov, spektakldiń qoıýshy-rejısseri Ashat Maemırov, Ahıko Tesýro rolin oryndaıtyn akter Dýlyǵa Aqmolda keńinen baıandady.
«Aqtastaǵy Ahıko» dramasy – teatrdyń 91 maýsymynyń alǵashqy premerasy. Teatr bul jańa qoıylymyn Qazaqstan Respýblıkasy Táýelsizdiginiń 25 jyldyǵyna arnap otyr.
«Qarlag» – Keńes Odaǵyndaǵy lagerlerdiń bas basqarmasy GÝLAG-tyń Qazaqstandaǵy eńbekpen túzeý lagerleriniń biri bolǵany belgili. Qýǵyn-súrginge ushyraǵan bir mıllıonǵa jýyq adam Karlagta nebir azapty kúnderdi bastan ótkerdi. Olardyń arasynda qazaqtarmen qatar orystar, ýkraındar, latyshtar, estondar, polıaktar, evreıler, nemister, japondar, fransýzdar, ıtalııalyqtar, taǵy da basqa kóptegen ulttar ókilderi boldy. Solardyń biri - japondyq Ahıko Tesýro.
Aqtasyn saǵynǵan Ahıko
Spektaklge osy Ahıkonyń qıly taǵdyry arqaý boldy. Naqtyraq aıtqanda, Keńes úkimeti kezinde stalındik qýǵyn-súrginge ushyrap, 17 jasynda jazyqsyzdan jazyqsyz ataqty Qarlag túrmesine túsip, jastyq shaǵyn azapty ómirmen ótkizgen, bosap shyqqan soń, Qaraǵandy mańyndaǵy Aqtas qalasynda turaqtap, qonystanyp qalǵan Ahıko esimdi japon azamatynyń taǵdyry kórkem baıandalady.
Keıin ákesimen jáne baýyrlarymen qaýyshqan Ahıko Tesýro óziniń tarıhı Otanyna barady, biraq, Qazaqstanǵa qaıta oralady.
Qazir Ahıko aqsaqal 85 jasta. 11 nemere, 5 shóbere súıip, úlken áýlettiń basy bolyp otyr.
Ahıko Tesýronyń taǵdyr joly – stalındik zulmat jyldarynda Qazaqstanǵa qonys aýdarǵan, aıdalyp, jazyqsyz sottalyp lagerlerge ákelingen myńdaǵan adamdardyń, túrli ult ókilderiniń taǵdyry. Qoıylymda Ahıkonyń taǵdyry arqyly, HH ǵasyrdaǵy eń aýyr kezeńde, azap lagerlerinde otyryp, óziniń adamı beınesin saqtap qalǵan rýhy myqty, jasampaz jandardyń jıyntyq beınesi jasalǵan.
Qazaqstannyń teatr keńistiginde tuńǵysh ret kózi tiri saıası qýǵyn-súrgin qurbanynyń taǵdyry derekti dramaǵa arqaý bolyp, sahnadan alǵash ret kórsetiledi. Ahıko Tesýro beınesi – barlyq qazaqstandyqtardy eldik pen birlikke, kelisim men yntymaqqa úndeıdi.
Qazaqstannyń eńbek sińirgen qaıratkeri, rejısser Ashat Maemırov sahnalaǵan bul qoıylym teatr ujymynyń Qazaqstan Respýblıkasynyń Táýelsizdiginiń 25 jyldyǵyna arnaǵan úlken jobasy.
Spektakl premerasy 22, 23 qazanda bolady.
Aınash ESALI,
«Egemen Qazaqstan».