Keshe elordada «EKSPO-2017 – elimizdiń týrıstik ındýstrııasyn damytý draıveri» degen taqyryp aıasynda dóńgelek ústel ótti. Týrızm salasyn damytý joldary, osy baǵytta halyqaralyq kórmeniń aıasynda atqarylýǵa tıis sharalar talqylanǵan jıynǵa «Qazaqstan áıelderi qaýymdastyǵy» qoǵamdyq birlestigi men «EXPO&WOMEN» halyqaralyq uıymy muryndyq boldy.
Astana qalasy ákimdiginiń, birqatar mınıstrlikterdiń, «Astana EKSPO-2017» ulttyq kompanııasynyń ókilderi, qonaqúıler men meıramhanalar jáne týrıstik operatorlar qaýymdastyqtarynyń basshylary dóńgelek ústel basynda halyqaralyq týrızmdi damytý múmkindikteri, elorda tóńireginde qyzyqty týrıstik marshrýttar qalyptastyrý, ekskýrsııa jetekshilerin daıyndaý, volonterler ázirleıtin kásibı ortalyq ashý syndy jumystar boıynsha oılaryn ortaǵa saldy. Sondaı-aq, Astanadaǵy qonaqúılerdiń daıyndyǵy, páter men bólmelerdi jalǵa berý jalǵa berý máseleleri de talqylandy.
Osy basqosýda aıtylǵandaı, kez kelgen elde týrızmdi damytýda eń mańyzdysy – sol eldiń halqy. Iаǵnı, adamdarynyń qonaqjaı peıili, týrısterdi qyzyqtyrý sheberligi basty ról oınaıdy. Sulý tabıǵat, kórikti jerler, tarıhı nysandar men mýzeılerdiń bolýy odan keıingi orynda. Úshinshi bir mańyzdy faktor – ınfraqurylym, týrızmdi órkendetý isinde ol da aıryqsha ról oınaıdy. Investısııalar jáne damý mınıstriniń keńesshisi Táńirbergen Berdiońǵarovtyń aıtýynsha, mınıstrlik qazir osy baǵytttar boıynsha belsendi túrde jumys istep jatyr.
«Investısııalar jáne damý mınıstrligi memlekettik jáne jergilikti atqarýshy organdarmen tize qosyp, kóptegen jumystardy qolǵa alýda. Atap aıtar bolsaq, «Astana EKSPO-2017» Ulttyq kompanııasymen birlesip, 33 týrıstik marshrýtty qalyptastyrdyq. Halyqaralyq kórmege kelgen týrısterdi osy marshrýttarmen aralatý josparlanyp otyr. Aldaǵy jyly Qazaqstanǵa keletin sheteldik meımandardyń qatary qalyń bolady dep josparlanǵan. Elimizdiń basqa óńirlerinen keletin qonaqtar da az bolmaýǵa tıis. Olarǵa laıyqty qyzmet kórsetý úshin elordaǵa jáne basqa qalalarǵa kólik qatynastaryn jetildirý qarastyrylýda. Astana áýejaıynda jańadan termınal salynyp jatqan termınal osy maqsatqa arnalǵan. Budan bólek, temirjol vokzalynyń qurylysy júrip jatyr. Iаǵnı, týrısterdiń áýe joly ǵana emes, eýropalyq standarttar boıynsha salynǵan temirjol, avtokólik joldary arqyly da saparlaýyna tolyq jaǵdaı jasalýy tıis» dedi T.Berdiońǵarov.
Investısııalar jáne damý mınıstrliginiń málimetine súıensek, aldaǵy jyly Astana áýejaıynyń halyqaralyq áýe baǵyttary 51-den 63-ke kóbeımek. Reısterdiń sany da 231-den 350-ge jetedi dep josparlanǵan. Temirjol vokzaly aı saıyn 1 mıllıon adamdy qabyldap, jyl sońyna deıin 12 mıllıon adamǵa qyzmet kórsetýi kerek. Áýe jáne temirjol qatynastaryndaǵy osyndaı ózgerister bılet baǵasyn arzandatýǵa jol ashady. Al baǵany arzandatý ishki týrızmniń damýyna da yqpal etetini sózsiz.
Dóńgelek ústel basynda aıtylǵandaı, halyqaralyq týrızmniń órkendeýine qolaıly ahýal qalyptastyrý maqsatynda mıgrasııalyq jaǵynan qaýip-qater týǵyzbaıtyn, ishki jalpy óniminiń kólemi Qazaqstannan joǵary elderdiń azamattaryna elimizdiń aýmaǵyna kedergisiz enýge, týrıstik marshrýttarmen emin-erkin saıahattaýyna jaǵdaı jasalady.
Osy jıyn qorytyndysy boıynsha, «EXPO&WOMEN» halyqaralyq uıymy men Qazaq tehnologııa jáne bıznes ýnıversıtetiniń arasynda týrızm salasyndaǵy yntymaqtastyq týraly memorandým jasaldy. Memorandýmda kásibı volenterlar, ekskýrsııa jetekshilerin daıyndaý jumystaryn birlesip atqarý qarastyrylǵan.
Arnur ASQAR,
«Egemen Qazaqstan»