Daǵdarysqa qaramastan qazaqstandyqtar elimizde qurastyrylǵan otandyq jeńil kólikterdi belsendi satyp alýda.
Bul týraly Ortalyq kommýnıkasııalar qyzmetindegi brıfıngte «QazAvtoО́nerkásip» Qazaqstannyń avtomobıl salasy kásiporyndarynyń odaǵy basqarmasynyń tóraǵasy Oleg Alferov málim etti, dep habarlaıdy QazAqparat.
«Qazaqstandyqtar aı saıyn 3200-3500, al toqsan saıyn shamamen 10 myń jańa jeńil avtomobıl satyp alady. Biz munyń qandaı da bir turaqty san ekenin baıqap otyrmyz. Sonyń arqasynda otandyq avtomobıl ónerkásibi óziniń qaıta qalpyna kelý qozǵalysyn órlete túser degen úmitimiz bar. Munyń aǵymdaǵy jyldyń tórtinshi toqsanynda oryn alýy múmkin ekendigin de joqqa shyǵarýǵa bolmaıdy», - dedi ol.
Onyń atap ótýinshe, elimizde quralǵan kólikterdiń aqaý shyǵýyna baılanysty keri qaıtarylǵandary joq desek te bolady. Bolǵan kúnniń ózinde olardyń sany saýsaqpen sanarlyq qana.
«Bul otandyq avtozaýyttardaǵy óndiris prosesi sapasyna baqylaýdyń joǵary dárejesimen qatar shyǵarylatyn kólik sanynyń shaǵyndyǵymen de baılanysty. Atalǵan jaıt otandyq avtomobıl óndirisine tán. Esterińizge sala ketsek, daǵdarysqa deıingi shyrqaý shegimiz jylyna 40 myń avtomobıldi quraǵan edi», - dedi Alferov.
Sonymen qatar ol BAQ ókilderiniń qazaqstandyq avtomobıl brendin qurý máselesine qatysty da saýaldaryna jaýap berdi. Onyń aıtýynsha, bul maqsatqa jetý úshin óte mol ınvestısııalyq qarjy kerek. Al ol qarjynyń odan ary qaıtarymynyń bolýy da neǵaıbyl.
«Buǵan deıin bolmaǵan jańa bir ónim shyǵarý úshin keminde 800 myń nemese 1 mıllıon dollar, al keıde 1 mlrd. dollar qarjy biregeı tuǵyrnama qurý úshin qajet bolady. Bul talap etiletin ınvestısııa kólemi. Al ol biz úshin qoljetimsiz», - dedi ol.