Sońǵy jyldary álemniń ár túkpirinde qazaq kúresimen kásibı túrde shuǵyldanatyn sportshylardyń qarasy artyp keledi. Onyń aıqyn dáleli retinde, «Eýrazııa barysy», «Álem barysy» syndy qazaq kúresinen ótetin jarystarǵa qatysýshylardyń sanynyń kún ótken saıyn artyp kele jatqandyǵy der edik. Munyń syrtynda aımaqtarda da halyqaralyq deńgeıdegi jarystar ótetin bolǵan. Sondaı saıystyń biri Qyzylorda oblysy, Jańaqorǵan aýdanynyń Mashbek aýylynda ótti. Eńbek ardageri Mashbek Nálibaevty eske alýǵa arnalǵan jarys dástúrli jarys bıyl 11-shi ret jalaýyn kóterdi. Oǵan Qazaqstan, Grýzııa, Mońǵolııa, Qyrǵyzstan jáne О́zbekstannan barlyǵy 28 balýan qatysty.
Saıystyń ashylý saltanatyna Qyzylorda oblysynyń ákimi Qyrymbek Kósherbaev pen óńiraralyq áriptestik aıasynda delegasııany bastap kelgen Aqtóbe oblysynyń ákimi Berdibek Saparbaev qatysyp, sportshylardy dástúrli dodamen quttyqtady.
– Qazaq kúresinen respýblıkalyq chempıonat on birinshi ret jáne túıe balýandar arasyndaǵy halyqaralyq týrnır ekinshi márte ótip jatyr. «Qazaqstan barysynyń» alǵashqy jeńimpazy shyqqan aımaq úshin osy báseke bolashaqta da bıik maqsatty baǵyndyrý baspaldaǵy bolmaq. Búginde Elbasynyń erekshe qoldaýynyń arqasynda elimizde sporttyq ınfraqurylym qarqyndy damyp, deneshynyqtyrýmen shuǵyldanýshylar qatary ósti. Bıyl el Táýelsizdiginiń 25 jyldyǵy qarsańynda týrnır ótkizemiz. Táýelsiz memleketimizge beıbitshilik, qazaqstandyq sportshylarǵa jeńis tileımin, – dedi Qyrymbek Kósherbaev. Al Berdibek Saparbaev sportshylar men jankúıerlerge jarystyń kórigin qyzdyryp, belsene at salysqandary úshin alǵys aıtty.
Sonymen, halyqaralyq týrnır de máresine jetti. Bas júldeni Grýzııadan kelgen balýan Levan Matıashvılı ıelenip, «Lada Granta» avtokóligin jeńip aldy. Ekinshi oryn jáne 500 myń teńge aqshalaı syılyq qazaqstandyq Aıbek Nuǵymarovtyń enshisine buıyrdy. Úshinshi orynǵa taǵy bir gúrjistandyq Gýram Týshıvılı turaqtady. Oǵan 300 myń teńge aqshalaı syılyq berildi. Budan bólek, «Jan Araı» JShS dırektory Baqdáýlet Maqashev óz atynan Týshıvılıge 1000 AQSh dollaryn tabystady. Týrnırdiń qorytyndysy boıynsha ózge de sportshylar dıplommen jáne alǵys hattarmen marapattalyp, baǵaly syılyqtar tabys etildi.
Erjan BAITILES,
«Egemen Qazaqstan»
Qyzylorda oblysy,
Jańaqorǵan aýdany