Aqtaýdaǵy «Aqtaý teńiz porty» arnaıy ekonomıkalyq aımaǵynan jańa zaýyt iske qosyldy. Elimizde jańa sanatty jáne joǵary sapaly ónim óndiretin zaýyt óńirdiń áleýmettik-ekonomıkalyq damýyna zor úlesin qosady dep kútiledi.
Italııalyq «Tenarıs Global Servısez» kompanııasy 12 mlrd teńge ınvestısııa salǵan premıým sanatty bolat qubyrlardy keskindeıtin zaýyt qurylysy az merzimde aıaqtaldy. Qazaqstan boıynsha alǵash ret atalmysh ónimdi óndirýdi qolǵa alǵan zaýyt «Qarashyǵanaq Petroleým Opereıtıng B.V.» jáne «TeńizShevroıl» munaı kompanııalarymen uzaq merzimdi kelisimshartqa otyrǵan. Kompanııa bul ken oryndaryn munaı jáne gaz ónimderin tasymaldaý úshin tolyqtaı óz ónimderimen qamtamasyz etýdi, sondaı-aq, Qazaqstandaǵy ózge de iri ken oryndaryndaǵy munaı-gaz jobalaryna kommersııalyq, tehnıkalyq, ınjenerlik jáne logıstıkalyq qoldaý kórsetýdi mejelep otyr.
Bul kásip túrine mashyqtanǵan, tájirıbesi jetkilikti ıtalııalyq kompanııa qarjy quıǵan zaýyttan óndirilgen ónim, «Tenarıs Global Servısez» kompanııasy basqarma tóraǵasy Paolo Rokkonyń aıtýynsha, joǵary fýnksııaly jáne burǵylaý kezinde kezdesetin eń aýyr jaǵdaılarǵa tótep beredi, ıaǵnı jaǵdaıǵa saı qyzmet etedi eken. Ázirge elimiz boıynsha gazdy-germetıkalyq burandaly-bólshekti qubyrlardy keskindeıtin jalǵyz zaýyt sanalatyn zaýyttyń jyldyq qýaty – 45 myń tonna. Kúshine engen soń 90 adamdy jumys ornymen qamtıtyn zaýytta qazirgi tańda 40 adam jumys isteýde. Mamandar aldyn ala Rýmynııada oqyp, is-tájirıbe jınaqtap qaıtty. Zaýyt óz ónimderimen 80 paıyz ishki naryqty qamtamasyz etip, 20 paıyz ónimdi syrtqy naryqqa – Reseı jáne Eýropa elderine eksporttaýdy kózdeıdi.
Mańǵystaý oblysy ákiminiń orynbasary R.Ámirjanovtyń aıtýynsha, jyl sońyna deıin «Aqtaý teńiz porty» arnaıy ekonomıkalyq aımaǵy» aýmaǵynan taǵy bir nysan iske qosylmaq. Mańǵystaýdyń geografııalyq ornalasýy men munaı ken oryndarynyń shoǵyrlanýy jańa zaýyttardyń irgetasy munaıly óńirde qalanýyna septigin tıgizedi eken.
Elimizdiń Energetıka mınıstriniń orynbasary M.Myrzaǵalıev, qazaqstandyq jáne sheteldik munaı kompanııalarynyń ókilderi qatysqan zaýyttyń ashylý saltanatynda bul isti el ekonomıkasyn damytýǵa úles qosady dep baǵalap, zaýyt jumysyna sáttilik tiledi.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy