Oraldyq Alekseı men Natalıa balalaryna: «Bizdiń Otanymyz – Qazaqstan. Osy qazaq jeriniń topyraǵynda dúnıege keldik. Senderdiń bárińniń týǵan jerleriń Oral bolǵanymen, osy Aqjaıyqqa degen mahabbatty tutas elge, qazaq halqyna degen qurmetke ulastyryńdar», dep únemi aıtyp otyrady. Ákesi men anasynyń ónegesin qyzdary Ekaterına da bala kezinen kókeıine toqyp ósti. Ekaterına dep otyrǵanymyz – dúbiri men jańǵyryǵy áli tolyq basyla qoımaǵan Rıo Olımıpıadasynyń qola júldegeri Ekaterına Larıonova.
Katıanyń boıyndaǵy otanshyldyq sezimniń tereńdigine tegi orys, reseılik bolǵanymen, AQSh atynan shyqqan 29 jastaǵy álem chempıony Elena Pırajkonyń jaýyrynyn jerge tıgizgende barsha qazaqstandyq jankúıer aıqyn kóz jetkizdi deı alamyz. Balýan qyzdyń sol sáttegi qýanyshy kóz aldymyzda jattalyp qaldy. Jeńiske jetkenin estı sala, Katıa halyqaralyq jarystarǵa barǵanda janynan tastamaı alyp júretin Qazaqstannyń Kók týyn tez alyp shyǵyp, qulashyn keńge jaıyp tóbesinen asyra kóterdi. Endigi bir sátte tizerlep otyra qalyp súıdi. Artynsha Kók týdy tóbesinde jelbiretken kúıi kúres kilemin aınala júgirdi. Qazaqstandyq jankúıerler otyrǵan trıbýnaǵa jaqyndap, basyn ıgen kezde Katıanyń janarynda qýanyshtyń kóz jasy mólt etti.
Balýan qyzymyz elge oralysymen biz oǵan habarlasyp, sol sátte qandaı sezimde bolǵanyn, ne oılaǵanyn suraǵan edik. Bizdi tánti etkeni, Ekaterına eń aldymen elin oılapty. Baıtaq Qazaqstany kóz aldyna kelipti. Sodan keıin kindik qany tamǵan Oraly, ákesi ári jattyqtyrýshysy Alekseı Larıonov...
– Qazaqstan quramasynyń bas bapkeri, ekinshi jattyqtyrýshy Qaırat Saǵadıev te esime tústi. О́zińniń jeńiske jetýiń úshin ter tókken, eńbek etken jandardyń bári kóz aldyńa keledi. Árıne, báriniń bastaýynda Otanym – Qazaqstanym tur, – deıdi Katıa.
Ekaterınamen sóılesip otyryp, onyń sonshalyqty otanshyl, shynshyl adam ekendigin ańǵarasyz. Ol úshin eldigimizdi, táýelsizdigimizdi bildiretin árbir nyshan qasterli. «Avtobýsta kele jatyp edende jatqan baqyrdy kórsem, ony eńkeıip alýdan arlanbaımyn. Kerisinshe, baqyr tıyn eken dep eńkeıip almaı qoıýdan arlaný kerek. Sebebi, onda Eltańbamyz bederlengen,– deıdi E.Larıonova. – Meniń endigi armanym – Olımpıada altynyna qol jetkizý. Qazaqstannyń Ánuranyn shyrqatý, Týymyzdy bıikke kóterý.
Rıo Olımpıadasynan keıin esimi baıtaq elge jaıylǵan Ekaterına kóp balaly otbasynda týyp-ósken. Alekseı men Natalıa Larıonovtardyń tula boıy tuńǵyshy. Artynan ergen Nurlybek, Dáýlet, Alekseı jáne Matveı esimdi tórt inisi bar. Osy materıaldy ázirleý kezinde «Qazaqparattyń» óńirdegi ókili, belgili jýrnalıst Ǵaısaǵalı Seıtaq ekeýmiz Katıanyń ákesimen sóılesip, eki balasynyń esimi nelikten qazaqsha qoıylǵany týraly suraǵan edik. Olımpıada júldegeriniń jeke bapkeri Alekseı Stanıslavovıch aǵynan jarylyp baıandap berdi:
– Munyń syry mynada. Men jas kezimde ataqty qazaq balýany Dáýlet Turlyhanovpen dos bolyp, birge júrdim. Ekeýmiz Almatydaǵy sport rotasynda birge qyzmet ettik. Ekeýmiz de klassıkalyq kúres, ıaǵnı grek-rım kúresinen bir salmaqta kúrestik. Oqý-jattyǵý jıyndarynda jubymyz jazylmaıtyn.
Dáýlet boz kilemde únemi meniń aldymdy orap ketip júrdi. Sóıtip, sol kezeńde men Qazaqstandaǵy ekinshi nómirli balýan atandym. Jasóspirimder arasynda eki márte el chempıony, Azııa birinshiliginiń júldegeri atansam da, kóp uzamaı kúresti qoıyp, bapkerlikti qolaı kórdim. Al Dáýlet keıin 74 kıloǵa aýysyp, KSRO-nyń 7 dúrkin chempıony boldy. Álem chempıonatynda jeńiske jetti, Olımpıadanyń eki dúrkin júldegeri atandy. Dáýlet boz kilemde qarsylas shaq keltirmedi, óz salmaǵynda bárin alyp uratyn. Osy ataq-dańqyna qaramastan, ol meni umytqan emes. Kezinde Qazaqstan chempıony bolǵanymdy aıtyp, Oraldan páter alýyma da kómektesti. Osyndaı shynaıy, adal dostyqty men qalaı umytaıyn?! 1999 jyly ómirge kelgen ulymnyń esimin dosymnyń qurmetine Dáýlet dep qoıdym.
Dańqty balýannyń esimin ıelengen Dáýlet qazirdiń ózinde grek-rım kúresinen jasóspirimder arasynda halyqaralyq arenada olja salyp júr. Sporttaǵy daryndy balalarǵa arnalǵan ınternattyń 11-synybynda oqıdy. Ata-anasy 2003 jyly týǵan inisi Alekseıdi de aǵasynyń qasynda bolsyn, kúres álippesin úırensin dep sol mektep-ınternatqa beripti.
Alekseı Stanıslavovıch:
– Katıanyń izin basa kelgen tete inisiniń esimin bala kezimizden birge ósken dosym Nurlybek Raıymqulovtyń qurmetine Nurlybek dep qoıdyq. Kenjemiz Matveı 5-ke endi toldy. Balalarymnyń esimin qazaqsha qoıǵanym – kóńili keń daladaı darqan minezdi, qushaǵy kim-kimge de aıqara ashyq qazaq halqyna degen qurmetim, – deıdi.
El mereıin asqaqtatqan balýan qyzdyń otbasymen emen-jarqyn shúıirkelestik. Baqyt uıalaǵan, shattyq kernegen Larıonovtar shańyraǵynan kóńilimiz toǵaıyp, keýdemiz tolyp shyqtyq. О́mirge Katıadaı qaısar, baıypty, kelbeti men kórkem minezi úılesken erli-zaıypty Alekseı men Natalıa Larıonovtarǵa degen rızashylyq sezim qaldy kókeıde.
Temir QUSAIYN,
«Egemen qazaqstan»
Batys Qazaqstan oblysy