22 jastaǵy avstralııalyq Vıllıam Tımotı Bıornnyń motosıkli Aqmola oblysynyń jaılaýynda synyp qaldy. Jańbyr jaýyp, saıahatshy sýyq saldarynan baqılyq bola jazdady, dep habarlaıdy «Egemen-aqparat» QazAqparatqa silteme jasap.
QR IIM Tótenshe jaǵdaılar komıtetiniń resmı ókili Rýslan Imanqulov habarlaǵandaı, 2016 jyly 17 qazanda 12 saǵat 38 mınýtta Jaqsy aýdany Jaqsy aýylynyń №13 órt sóndirý bólimine belgisiz azamat Novokıenka aýylynyń janynda shetel azamatynyń motosıkli synyp, oǵan kómek kerek ekenin habarlaǵan.
Oqıǵa ornyna tótenshe jaǵdaılar boıynsha aýdandyq bólim men órt sóndirý bóliminiń qyzmetkerleri shyqty.
«Oqıǵa ornyna jetkende motosıkl tabyldy. Onyń ıesi 1994 jyly týǵan Avstralııa azamaty (saıahatshy) Vıllıam Tımotı Bıorn. Ol Astanaǵa bara jatqan, alaıda aýa raıynyń qolaısyzdyǵyna baılanysty adasyp, motosıkli synǵan», - delingen habarlamada.
«Lých» sharýa qojalyǵynyń basshysy Dychok Bıorn men onyń motosıklin Jaqsy aýylynyń №13 órt sóndirý bólimine jetkizdi.
Vıllıam Tımotı Bıorndy tamaqtandyryp, kıindirip, bólimde túnep shyǵýǵa qaldyrdy. Sonymen qatar №13 órt sóndirý bóliminiń júrgizýshileri sheteldiktiń motosıklin jóndedi.
18 qazanda saıahatshy Astanaǵa saparyn jalǵastyrdy.