Aqtóbede Qazaqstannyń halyq jazýshysy, memleket jáne qoǵam qaıratkeri, Eńbek Eri Ábish Kekilbaevty eske alýǵa arnalǵan birqatar shara ótti. Oǵan qatysýǵa Astanadan jáne Almatydan arnaıy qonaqtar keldi. Olardyń arasynda Ábish Kekilbaevtyń jary Klara Jumabaeva, qyzy Sáýlet Kekilbaeva, Qazaqstan jazýshylar odaǵynyń basqarma tóraǵasy, aqyn Nurlan Orazalın, qoǵam qaıratkeri Zeınolla Alshynbaev, akademık Kenjeǵalı Saǵadıev, jazýshy Qajyǵalı Muhambetqalıev,zań ǵylymdarynyń doktory Beket Turǵaraev, qazaqtyń belgili aqyn qyzdary Hanbıbi Esenqaraeva,Ońaıgúl Turjanova, aqyn О́tegen Oralbaev,«Egemen Qazaqstan»respýblıkalyq gazeti» AQ basqarma tóraǵasy Darhan Qydyráli boldy.
Qonaqtar aldymen qazaqtyń kórnekti qalamgeri Tahaýı Ahtanov pen ataqty aqyn Qýandyq Shańǵytbaevtyń eskertkishterine gúl shoqtaryn qoıdy. Sodan keıin M. Qusaıynov atyndaǵy oblystyq daryndy balalarǵa arnalǵan mektep-ınternatynda jáne Nazarbaev zııatkerlik mektebinde Ábish Kekilbaevqa arnalǵan qazaq ádebıeti jáne qazaq tili bólmeleriniń ashylýyna qatysty.
Tústen keıin Q. Jubanov atyndaǵy Aqtóbe óńirlik memlekettik ýnıversıtetinde Ábish Kekilbaev atyndaǵy dárishananyń ashylý saltanaty ótti. Oǵan Ábish Kekilbaevtyń otbasy músheleri, memleket jáne qoǵam qaıratkerleri, jergilikti aqyn-jazýshylar, ýnıversıtettiń professor-oqytýshylyq quramy, stýdentter men zııaly qaýym ókilderi qatysty. Osy ýnıversıtettiń fılologııa fakýltetiniń stýdenti 3 kýrs stýdenti Qaıyrhan Jubanııazov zamanymyzdyń zańǵar tulǵasyna arnaýy jınalǵan jurttyń kóńilinen shyqty.
[caption id="attachment_67705" align="alignnone" width="560"] ????????????????????????????????????[/caption]
Budan keıin osy ýnıversıtettiń Stýdentter saraıynda Ábish Kekilbaevqa arnalǵan «Ǵulama tulǵa, ǵıbratty ǵumyr» atty respýblıkalyq ǵylymı-praktıkalyq konferensııasy ótti. Onda jazýshynyń shyǵarmashylyǵy týraly osy joǵary oqý ornynyń gýmanıtarlyq zertteýler ortalyǵynyń dırektory Alpysbaı Musaev baıandama jasady. Qazaqstan jazýshylar odaǵynyń basqarma tóraǵasy Nurlan Orazalın, akademıkter Kenjeǵalı Saǵadıev, Amangeldi Aıtaly, jazýshynyń jary Klara Jumabaeva jáne basqalary qazaqtyń birtýar tulǵasy týraly estelikter aıtty. Konferensııa jumysyn oblys ákimi Berdibek Saparbaenv qorytyndylap, Ábish áleminiń jastarǵa ónege ekenin jetkizdi. Sondaı-aq, joǵary oqý oryndary men kolledjder stýdentteri úshin Ábish Kekilbaev atyndaǵy shákirtaqy taǵaıyndalatynyn atap ótti. Zańǵar jazýshynyń eske alýǵa baılanysty sharalardyń alda da jalǵasyn tabatynyn aıtty.
Qazaqtyń qarymdy qalamgerin eske alý sharalary keshke Tahaýı Ahtanov atyndaǵy oblystyq drama teatry ujymy sahnalaǵan Ábish Kekilbaev pen Shyńǵys Aıtmatovtyń «Hansha–Darııa hıkaıasy» spektakliniń tusaýkeserimen jalǵasty.
Satybaldy Sáýirbaı, Aqtóbe