oqyrman
...másele kóteredi
Ekologııalyq júıe nasharlap barady
Oral óńirindegi sý resýrstarynyń 80 paıyzy transshekaralyq ózenderdiń enshisine tıedi. Mundaǵy basty nysan óńirdegi ózge sý resýrstaryn qarjylandyratyn Jaıyq ózeni. Onyń jaǵalaýynda 87 eldi meken oranalasqan. Sońǵy ýaqytta mundaǵy ekologııalyq júıe tómendep, gıdrologııalyq normalar joıylyp barady. Jaıyqtyń arnasy tartylyp, sýy lastanýy, onyń mańyndaǵy janýarlar men ósimdikter dúnıesiniń azaıyp bara jatqany osynyń dáleli.
О́zen sýyn uqypty ári tıimdi paıdalaný úshin onyń arnalaryn arshyp, túbin tazartý qajet. Bul kúrdeli jumysty Reseıden bastaý alatyn sý qoımalarynan bastaǵan jón dep oılaımyz. Transshekaralyq Jaıyq ózeniniń ekologııalyq júıesin jańǵyrtý jumystary memleketaralyq mańyz ben sıpat alǵanda ǵana tıisti nátıje bermek. Sondyqtan buǵan kórshiles eki eldiń ókiletti organdary múddeli bolǵanyn qalaımyz.
Qazybaı BOZYMOV,
aýyl sharýashylyǵy ǵylymdarynyń doktory, professor
ORAL
...rızashylyq bildiredi
Sport keshenin salyp berdi
Kásippen degenine jetken azamattarǵa kóńiliń tolyp, al olardyń arasynda baılyǵyn shapaǵatty sharýaǵa baǵyttaǵandarǵa «Mine, azamat!» dep rıza bolasyń. «Jaqsynyń jaqsylyǵyn aıt – nury tasysyn» demekshi, Atyraý oblysy, Jylyoı aýdany, Shoqpartoǵaı aýylynyń turǵyny, jeke kásipker Baqytjan Dostanov osy aýyldaǵy ózi oqyǵan №3 orta mektepke «Yrys» sport keshenin syıǵa tartty degen habardy estip qýanǵanymyz bar. Bárekeldi deıtinimiz, kásipker sport kesheniniń qurylysyna óz qarjysy esebinen 87 mln teńge jumsapty. Jalpy alańy 807 sharshy metrdi alyp jatqan keshende erler men áıelderge arnalǵan dýsh, kıim aýystyrýǵa arnalǵan shkaftar, medısınalyq pýnkt jumys isteıdi. Sportpen shuǵyldaný úshin trenajer quraldary, ústel tennısi, basketbol, voleıbol oıyndaryna arnalǵan zaldar bar. Al qajetti qural-jabdyqtardy shetelden jetkizipti.
«Keshendi ózimizdi baǵyp-ósirgen, tálim-tárbıesin bergen marqum, asyl ájem Yrys atymen ataýdy uıǵardym. Búginde keshen óz jumysyn bastap ketti. Balalar dán rıza», – deıdi kásipker Baqytjan Dostanov.
Aldaǵy ýaqytta mádenıet úıin turǵyzyp, aýyldy kógaldandyrýdy josparlap otyrǵan azamatqa isiń ilgeri ozyp, kásibiń órge basa bersin degimiz keledi.
Zamanbek MUHAMETHANOV
Atyraý oblysy
...áserimen bólisedi
Ábish jáne Táýelsizdik
Mańǵystaý aýdanynyń Ońdy aýylynda osyndaı taqyrypta patrıottyq is-shara ótkizildi. Is-sharaǵa qoǵam jáne memleket qaıratkeri, halyq jazýshysy Ábish Kekilbaevtyń synyptas dosy, shetpelik ardager ustaz Aldabergen Qurmashev jáne aýdandyq jastar ortalyǵynyń basshysy Allabergen Qonarbaev, Ońdy orta mektebiniń oqýshylary men ustazdar qaýymy qatysty. Jastar aldymen Alashtyń anasy bolǵan Aı-Ana eskertkishine gúl shoqtaryn qoıyp, rýhyna taǵzym etti. Eskertkish basynda A.Qurmashev Ábekeń sııaqty álem tanyǵan alypty dúnıege ákelgen Aısáýle anamyz týraly estelik aıtty.
Budan soń shara Ońdy orta mektebinde jalǵasyp, jıynda ardager ustazdar Ábekeńniń Ushtaǵan aýylyndaǵy mektepte ótken balalyq shaqtaryn aıtyp, kópshilikti ózine baýrap aldy. Jıynda Ábekeńniń táýelsizdik alǵan jyldarda Parlamentte otyrǵan kezindegi jemisti jumystary jaıynda jastar ortalyǵynyń basshysy A.Qonarbaev aıtyp berse, Á.Kekilbaevtyń ádebı shyǵarmalaryn mektep oqýshylary naqyshyna keltire oqyp, jazýshynyń ónegeli ómiri týraly saýaldaryn qoıyp, tushymdy jaýaptaryn aldy. Basqosý sońynda oqýshylarǵa Sultan Orazalynyń «Qazaq zııalylary» atty beıneantologııasynan Ábish Kekilbaev týraly derekti fılm kórsetildi.
Aldash ShOŃAI
Mańǵystaý oblysy
...jańalyǵyn jetkizedi
Tigin fabrıkasy iske qosyldy
Qyzylorda qalasynda jańadan ashylǵan «Dalatex» tigin fabrıkasy óz ónimderin otandyq naryqqa shyǵarýdy qolǵa aldy. Ashylǵanyna birneshe aı ǵana bolǵan kásiporynda 30-ǵa jýyq qyzmetker jumys atqarady. Qyzmetkerlerdiń kóbisi «Jumyspen qamtýdyń jol kartasy-2020» baǵdarlamasy aıasynda jumysqa ornalasqan jumyssyz jastar. Kúnine 180-200 kóleminde erler men áıelder jáne balalar kóılegin tigip elimizdiń ár óńirindegi dúkenderge taratyp otyr. Halyq tutynatyn kıim-keshekterdiń kóbi Qytaı men Túrkııadan ákelinetinin eskersek, endi óz ónimimizdi tutynýǵa múmkindik alyp otyrmyz.
Kıimderdi basqa elderden ákelip satýmen aınalysqan kásipker Dilmuhamed Abyzov oılana kele, tyń salany engizý qazirgi bıznesti damytýdyń oń sheshimi dep tapqan. Tigin fabrıkasynyń ónimderi ázirge el naryǵyna shyǵarylyp otyrsa, keleshekte alys-jaqyn shetelderge eksporttaý kózdelip otyr. «Fabrıkanyń «Dalatex» atalýynyń sebebi, eksport máselesin kózdegendikten aǵylshynsha ataý berdik. Ulttyq namysymyzdy qaırap, ozyq elderdiń aldyńǵy qataryna ený, alys-jaqyn shetelderge «Qazaqstanda jasalǵan» degen ónimdi taratý basty maqsatymyz», – deıdi Dilmuhamed Abyzov. Arnaıy baǵdarlama aıasynda Úkimetten 30 paıyz jeńildik alyp otyrǵan fabrıkanyń ázirshe tapqan tabysynan shyǵyny basymdaý. О́ıtkeni, bizdiń elimizde shıkizat tapshy, barlyǵy syrttan satylyp alynatynyn eskersek, bizge áli de qambamyzdy toltyratyn kásiporyndar qajet-aq.
Aıman MUQYShEVA
QYZYLORDA