Mekteptegi kıim úlgisi zań talabyna saı bolýy tıis

Mektep kıim úlgisiniń biryńǵaı erejege sáıkestigi týraly másele Astanadaǵy Ortalyq kommýnıkasııalar qyzmetinde ótken baspasóz máslıhatynda talqylandy. Bul sharaǵa Bilim jáne ǵylym vıse-mınıstri Elmıra Sýhanberdıeva, Ádilet vıse-mınıstri Záýresh Baımoldına, Din isteri jáne azamattyq qoǵam mınıstrliginiń din isteri komıtetiniń tóraǵasy Ǵalym Shoıkın qatysty. Alǵashqy sózdi E.Sýhan­ber­dıeva alyp, elimizde mindetti mek­tep formasy 2016 jyldan engi­zil­genin atap, qazir elimizdegi oqý­shy­lardyń 76 paıyzy (2 mln-nan astam) mektepterde belgilengen úlgi­ni kıip júrgenin jetkizdi. Al res­pýb­lıkamyzdaǵy bastaýysh synyp­tardyń oqýshylary 100 pa­ıyz jańa úlgide mektep formasyn kıedi eken. Alaıda, sońǵy jyldary bilim berý uıymdary oqýshylardyń dinı úlgide kıiný máselesine tap bolyp otyrǵanyn aıtty. Biraq el zań­darynda buǵan qatysty naqty baptar baryn eske salyp, oǵan «Bilim týraly» Zańnyń 3-babyn atady. Sol sekildi bilim berý men tárbıeleý júıe­si din men dinı birlestikterden bó­lin­genin jáne zaıyrly sıpatta eke­nin eske salyp, ol «Dinı qyzmet já­ne dinı birlestikter týraly» Zań­da bekitilgenin de atap kórsetti. «Bul – zaıyrly sıpattaǵy mektepterde áldebir dindi tikeleı nemese janama nasıhattaýǵa jol be­rilmeıdi degen sóz. Osyǵan baı­la­nysty 2016 jyldyń 14 qań­tarynda Bilim jáne ǵylym mınıstr­liginiń №26 buı­ry­ǵymen min­detti mektep úlgisi úshin biryńǵaı talap qoıatyn ereje engi­zile bas­tady. Onda «Memlekettik bi­lim be­rý uıymdarynda qolda­nys­taǵy zańnamaǵa sáıkes belgi­len­gen erejelerdi ustaný qajettigi aı­tyl­­ǵan», degen Bilim jáne ǵylym vı­se-mınıstri qyzdar men uldarǵa ar­nal­ǵan kıim úlgisin taldap berip, dinı atrı­býttardy, kıim jáne bas­kıim úlgi­lerin kııýge jol beril­meıtinin, bu­ǵan deıin de osy qaǵı­da bolǵanyn qa­dap aıtty. Ádilet vıse-mınıstri Z.Baı­mol­dına Bilim jáne ǵylym mınıstr­­liginiń buıryǵy zańǵa saı, munda esh­qandaı quqyq buzýshylyq joq ekenin atady. Ár azamat zań tala­byn buljytpaı oryndaýy kerektigin de tilge tıek etti. Jal­py, Ata Zańymyzdan bastap bar­lyq qujattarda azamattardyń qu­qy­ǵy qorǵalatyny taıǵa tańba bas­qan­daı jazylǵanyna naqty dálel-dáıekter keltirdi. Din isteri komıtetiniń tóraǵasy Ǵ.Shoıkın búgingi bala, ıaǵnı oqý­shy elimizdiń erteńi ekenin, son­dyq­tan olarǵa tálim-tárbıeni bilim uıasynda tereń berip, zań talaptaryn úıretip otyrý týra joldan taıǵyzbaıtynyn atady. Shynynda, «Jigitter, kún bol­dy oılanarlyq... Asyl sol – aqyl, bilim boıda barlyq», dep Shá­kárim aıtpaqshy, barlyǵyn aqyl­ǵa jeńdirip zań aıasynda sheshý qajettigi qaı-qaısymyzdy da oı­landyrýy tıis. Ásirese, ul-qyzy­nyń erteńinen úmit artqan ata-analar túrli kıim úlgisine emes, urpaǵynyń bilim-biligin oılasa utylmas edi. Kıim úlgisiniń zańǵa saı bolýy­nyń tek mektepte ǵana emes, joǵary oqý oryndaryna da qatysy bar kó­ri­nedi. Buryn bilim uıalarynda 5-6 oqýshy dinı úlgimen kıinetin bol­sa, sońǵy kezderi bul 300-den astam ul-qyzdyń «enshisine» tıip­ti. Bul – alańdatarlyq másele. Etek jaıa berse, bilimge qushtar ur­­paq sol bilimnen qol úzip qalýy da ǵajap emes. Endeshe, bilim berý, din sala­syn­­daǵy azamattar, ata-analar men ustaz­dar jumylyp oı-sanasy áli orny­ǵa qoımaǵan urpaqty joldan taı­dyryp almaýǵa kúsh salyp túsin­dirý jumystaryn júrgizýleri tıis. Súleımen MÁMET, «Egemen Qazaqstan»