Memlekettik hatshy Gúlshara Ábdiqalyqova Qazaqstannyń eńbek sińirgen ártisi, ulttyq sahna óneriniń sańlaǵy Habıba Elebekovanyń dúnıeden ozýyna baılanysty onyń otbasyna qaıǵylaryna ortaqtasyp, kóńil aıtty.
Jedelhatta ǵasyrdan astam jasaǵan Habıba Qaraqbaıqyzy qazaq halqynyń sońǵy júzjyldyqta basynan ótken nebir náýbet kezeńderdi óz kózimen kórip, kóńiline túıip, tarıhı shyndyqty urpaq sanasyna sińire bilgen kónekóz ardaqty ardagerlerimizdiń biri edi, delingen.
«Teatrdyń qasıetti tabaldyryǵyn 17 jasynda attap, 70 jyldan astam ǵumyryn qazaq mádenıetiniń órkendeýine arnaǵan birtýar óner ıesi somdaǵan sahnalyq keıipkerleri halyqtyń rýhanı qazynasyna aınalyp, jas urpaqty eldi qasterleýge, ultty ulyqtaýǵa, dástúrdi dáripteýge tárbıelep keledi», dep jazylǵan jedelhatta.
Memlekettik hatshy jedelhatta daryndy tulǵanyń ǵıbratty ǵumyry óskeleń býynǵa ónege bolyp, jarqyn beınesi halqymyzdyń jadynda máńgi saqtalatynyn jetkizdi.
«Egemen-aqparat»