Qazaqstanda búgingi kúnge deıin 3263,6 myń tonna arpa jınaldy, dep habarlaıdy QR AShM baspasóz qyzmeti.
Bul kórsetkish byltyrǵy ónimimen salystyrǵanda 594 myń tonnaǵa artyq. Ústimizdegi jyly arpa 1 897,2 myń ga alqapqa egildi. Qazirgi kezde 99,6 % alqap oryldy. Bıylǵy ortasha túsimdilik 1 ga 17,3 sentnerge jetip otyr. Salystyrý úshin aıtar bolsaq, 2015 jyly túsim 1 ga 13,5 sentnerden keldi. Sonymen qatar, respýblıka boıynsha qaraqumyq jınaý naýqany aıaqtaldy. Qorytyndylaı kelgende, sharýalar osy ónim túriniń 100 myń tonnasyn bastyrdy. Túsimdilik 1 ga 10,1 sentnerdi qurady. Aıta keteıik, elimizdiń 7 oblysynda sharýalar qaraqumyq egýmen aınalysady. Negizinde respýblıkanyń soltústik óńirlerinde ósiriledi. Taǵy bir aıta keterlik jaıt, QR Aýyl sharýashylyǵynyń birinshi vıse-mınıstri Q.Aıtýǵanov Úkimet otyrysynda keleshekte egis alqaptarynyń qurylymynda aıtarlyqtaı ózgerister bolatynyn eskertken edi. Aldaǵy jyldary egis alqaptaryndaǵy astyq kólemi 2 mln gektarǵa azaıyp, maıly daqyldar egisiniń aýqymy artady.