Astanadaǵy «EKSPO-2017» halyqaralyq mamandandyrylǵan kórmesiniń aýmaǵyndaǵy turǵyn úılerdiń qurylysy 90 paıyzǵa daıyn tur, dep habarlaıdy QazAqparat «Báıterek» UBH» AQ baspasóz qyzmetine silteme jasaı otyryp.
Búgin «Báıterek» ulttyq basqarýshy holdıngi» AQ Basqarma Tóraǵasy Erbolat Dosaev qurylys barysymen tanysty.
«Báıterek» holdıngi óziniń enshiles uıymy «Báıterek development» AQ arqyly Astana qalasynda EKSPO-2017 halyqaralyq mamandyrylǵan kórme aýmaǵyndaǵy turǵyn úılerdiń, saýda-oıyn-saýyq ortalyǵynyń qurylysyn ınvestısııalaıdy. Aýdany 107 myń sharshy metr (1 374 páter) 42 turǵyn úı salyndy. Úılerge syrtqy jáne ishki jeliler qosyldy, páterlerdi ishki árleý, úılerdiń qasbetterin árleý aıaqtaldy, aýmaqty kóriktendirý jumystary júrip jatyr. Turǵyn úı keshenderinde parkıngter, sondaı-aq kommersııalyq úı-jaılarǵa arnalǵan aýdandar kózdelgen. Qurylys-montajdaý jumystary kestege sáıkes júrgizilýde», - dep habarlady kompanııanyń baspasóz qyzmeti.
Aıta keteıik, kórme kezinde bul páterler halyqaralyq qonaqtardy ornalastyrý úshin kórmeniń uıymdastyrýshylaryna jalǵa beriledi. Kórme aıaqtalǵannan keıin naryqtyq talaptarmen turǵyn úılerdiń satylýy josparlanǵan.
«Jalpy aýdany 138 myń sharshy metrdi quraıtyn saýda-oıyn-saýyq ortalyǵynyń qurylysy aıaqtalyp qaldy. Syrtqy kommýnıkasııalar jetkizildi, ishki jelilerdi salý, ǵımarattyń ishki jáne syrtqy árlenýi, sondaı-aq irgeles aýmaqty kóriktendirý jónindegi jumystar júrip jatyr»,-dep habarlap otyr derekkóz.
Kompanııanyń aqparatyna súıensek, kórme aýmaǵyndaǵy turǵyn úıler men saýda-oıyn saýyq ortalyqtary 2016 jyldyń 1 jeltoqsanynda paıdalanýǵa berilý kerek.