2016 jylǵy 19-21 qazanda Almaty qalasynda QR Táýelsizdiginiń 25 jyldyǵyna arnalǵan «Qazaqstan hırýrgııa qyzmetiniń jetistikteri men damý perspektıvalary» atty halyqaralyq konferensııa ótýde.
Onyń barysynda transplantologııanyń ózekti máseleleri, shuǵyl hırýrgııalyq kómek kórsetýdiń zamanaýı tásilderi, ıntervensııaly kardıologııadaǵy, arıtmologııadaǵy, angıohırýrgııadaǵy jańa baǵyttar qarastyrylady. Bul týraly QR Densaýlyq saqtaý jáne áleýmettik damý mınıstrliginiń baspasóz qyzmetinen habarlady.
QR DSÁDM A.N. Syzǵanov atyndaǵy hırýrgııanyń ulttyq ǵylymı ortalyǵy (ári qaraı - HUǴO) uıymdastyrǵan sharaǵa 500-den astam otandyq dárigerler men alys-jaqyn sheteldiń 20 elinen kelgen 50 jetekshi mamandar qatysady.
Shara barysynda QR DSÁDM Jaýapty hatshysy Aıda Qurmanǵalıeva QR Densaýlyq saqtaý jáne áleýmettik damý mınıstri Tamara Dúısenovanyń atynan sóz sóılep, A.N. Syzǵanov atyndaǵy hırýrgııa ulttyq ǵylymı ortalyǵy - hırýrgııalyq jáne transplantologııalyq kómekti damytý boıynsha jetekshi emhanalardyń biri ekenin atap aıtty.
«2015 jyly 298 transplantasııanyń 68-i A.N. Syzǵanov atyndaǵy HUǴO-da ótkizildi, sonymen birge, 5 myńǵa jýyq hırýrgııalyq ota jasalyp, 4 myńnan astam pasıentke hırýrgııalyq kómek kórsetildi. Búginde ortalyq aımaqtyq aýrýhanalarda kórsetiletin bilikti ári sapaly medısınalyq kómekke, azamattar arasyndaǵy ólim-jitimdi azaıtýǵa negizdelgen ınnovasııalar engizý sharalary sátti júzege asyrylyp keledi», - dep kórsetilgen Tamara Dúısenovanyń alǵysózinde.
Mınıstrdiń pikirinshe, atalǵan konferensııa QR turǵyndaryna kórsetiletin hırýrgııalyq kómektiń jańa tásilderi men ádisterin engizý úshin tıimdi alań bolyp, densaýlyq saqtaý salasy, halyqtyń ómir súrý uzaqtyǵy men sapasyn arttyrý baǵytynda elder arasyndaǵy baılanysty nyǵaıta túspek.
QR DSÁDM Bas hırýrgi, A.N. Syzǵanov atyndaǵy HUǴO basqarma basshysy, akademık Bolat Baımahanov konferensııa Qazaqstandaǵy hırýrgııanyń damý deńgeıin kórsetedi dep esepteıdi.
«Qazirgi tańda 155 baýyr transplantasııasy, onyń ishinde 1 jasqa deıingi balalarda - 11, 720 búırek transplantasııasy ótkizilip, júrek-qantamyrlar júıesin emdeýdiń zamanaýı hırýrgııalyq tásilderi, ınvalıdızasııaǵa jol bermeı, pasıentterdiń ómirin uzartýǵa múmkindik beretin plastıkalyq hırýrgııa salasyndaǵy zamanaýı ádisteri engizildi», - dep aıtty Bolat Baımahanov.
Jýyrda konferensııa aıasynda A.N. Syzǵanov atyndaǵy HUǴO-da O. Alfıerı (Italııa), A.Bogacheva-Prokofeva (Reseı), Kengo Kanateka (Japonııa), Bolat Baımahanov (Qazaqstan) syndy belgili mamandardyń qatysýymen kardıohırýrgııa, ıntervensııaly kardıologııa, gepatopankreato-bılıarlyq hırýrgııa, baýyr transplantasııasy, óńesh jáne ishek-qaryn joldarynyń hırýrgııasy, nefrologııa, búırek transplantasııasy boıynsha sheberlik synyptary ótti.
Ári qaraı otandyq hırýrgtar sheteldik sarapshylar bólisken tájirıbeni óz emhanalyq isinde qoldana alady.
Konferensııa sońynda úzdik mamandar Mınıstrdiń alǵys hattaryna ıe boldy.