Almatyda ótken Qazaqstan Boks federasııasynyń kezekten tys konferensııasy osyndaı tujyrymǵa toqtaldy. Onda elimiz bylǵary qolǵap sheberleriniń Rıo-de-Janeıro Olımpııa oıyndaryndaǵy óner kórsetýleriniń qorytyndylary talqylanyp, federasııa prezıdentin qaıta saılaý úderisi júrgizildi.
Konferensııaǵa qatysýshylar federasııa prezıdenti etip bir aýyzdan Tımýr Qulybaevty qaıta saılady. Ol bul qyzmetti 2009 jyldan beri atqaryp keledi. Osy aralyqta qurama boksshylary 2012 jyly Londonda 1 altyn, 1 kúmis jáne 1 qola medal jeńip alsa, 2016 jyly Rıoda 1 altyn, 2 kúmis jáne 2 qola medal jeńip aldy.
Sońǵy jyly federasııada birneshe mańyzdy oqıǵa oryn aldy. Mamyr aıynda Astanada bokstan áıelder álem chempıonaty ótti. Jarysta Qazaqstan quramasy 4 altyn, 2 qola medalmen jalpy komandalyq birinshi orynǵa shyǵyp, keremet kórsetkishke jetti. Budan eki kún buryn Shý qalasynda federasııanyń «Tarlan» atty deneshynyqtyrý-saýyqtyrý kesheni ashyldy. Onda balǵyn boksshylar, dzıýdoshylar, aýyr atletter jáne taekvondashylar daıarlanady. Bul – Tımýr Qulybaevtyń tikeleı bastamasymen Semeı, Qyzylorda jáne Túrkistan qalalarynda boı kótergen sport ǵımarattarynan keıin qatarǵa qosylyp otyrǵan osyndaı tórtinshi nysan.
Sońǵy tórt jyldyqtyń qorytyndysyndaǵy mańyzdy oqıǵa retinde qurama komandanyń Rıo jazǵy Olımpıadasynda qol jetkizgen jetistikterin de aıtýǵa bolady. Ol Danııar Eleýsinovtiń Olımpııalyq oıyndardyń jańa chempıony atanýyna, sóıtip, elimiz táýelsizdik alǵaly beri qalyptasyp kele jatqan dańqty dástúrdiń jalǵasyn tabýyna aparyp ulastyrdy. Jeńip alǵan jalpy medaldar sany jaǵynan eń joǵary kórsetkishke jettik.
– Tóreshilikke qatysty kóptegen máseleler bar, – dep atap kórsetti federasııa prezıdenti Olımpıada qorytyndylaryna toqtala kelip. – AIBA-nyń aldaǵy otyrysynda osynyń jaıyn talqylaıtyn bolamyz. Sizder Vasılıı Levıttiń fınaldyq shaıqasynan keıin qandaı sharalar qabyldanǵanyn bilesizder me, – osy úshin AIBA-nyń atqarýshy dırektory qyzmetinen qýyldy, barlyq tóreshiler jumystan shettetildi. Álbette, budan bizge jeńildik kele salǵan joq. Degenmen, aldaǵy kúnderge degen senim paıda bola bastady. Memleket basshysy Levıt pen federasııanyń jumysyn erekshe atap ótti, bul Qazaqstan boksshylary sińirgen eńbekti baǵalaý bolyp tabylady. Men ózimizdiń qazirgi áleýetimizge qarap, kelesi Oıyndarda komandalyq esepte ekinshi orynǵa talasýǵa tolyq múmkindigimiz bar dep esepteımin. Tóreshiler jumysyndaǵy kemshilik bizde de bar. AIBA-nyń vıse-prezıdenti bolyp otyrǵan qazaqstandyq eki laýazymdy tulǵa boksshylarymyzdy referıler ádiletsizdiginen qorǵap qala almady. Osynyń bári bizdiń kelesi olımpııalyq sıkl barysynda qaperimizde júretin máseleler bolýǵa tıis.
Boks federasııasynyń prezıdenti óz sózinde ulttyq quramanyń bas bapkeri Myrzaǵalı Aıtjanovtyń jumysyna oń baǵa berip, oǵan jáne basqa da jattyqtyrýshylar tobyna tabys, tózimdilik jáne sáttilik tiledi.
Tımýr Qulybaev Tokıoda 2020 jyly ótetin kelesi Oıyndarǵa baratyn joldaǵy basty mindetter retinde álem sportyndaǵy básekelestiktiń ósýi jaǵdaıynda keshendi-ǵylymı toptardyń jáne jattyqtyrýshylardyń biliktilikterin arttyrýdy atap ótti.
Serik PIRNAZAR,
«Egemen Qazaqstan»