Elordanyń mádenı-rýhanı ómiri talǵamy bıik beıneleý óneriniń biregeı alańymen tolyqty. Qazaqstan Táýelsizdiginiń 25 jyldyǵyna oraı Forte Bank Astanada qazaqstandyq sýretshilerdiń shetelde satyp alyp, qazaq jerine qaıtarǵan jumystaryn usynatyn Kulanshi Art Space galereıasynyń tusaýkeserin ótkizdi.
О́nerdiń damýyna qoldaý kórsetý, sonymen qatar, el turǵyndarynyń rýhanı jáne mádenı deńgeıin joǵarylatý maqsatynda Forte Bank «Qulanshy» zamanaýı óner ortalyǵymen birlese otyryp, Forte Kulanshi Art Space jańa galereıasyn ashty. Jańa óner ordasy Astana qalasynda ornalasqan banktiń bas ǵımaratynda oryn tepti. Biregeı jobanyń júzege asyrylýyna Mádenıet jáne sport mınıstrligi de jan-jaqty kómek kórsetti.
Ashylý saltanatynda kórsetilgen toptamanyń negizgi bóligin bank shetelde satyp alyp, elimizge qaıtarǵan otandyq qylqalam sheberleriniń eńbekteri quraıdy. Jalpy, Forte Bank Qazaqstanǵa, ıaǵnı bul avtorlardyń týǵan eline, tanymal qazaqstandyq sýretshilerdiń 24 týyndysyn qaıtardy. Olardyń arasynda Á.Qasteev, K.Mýllashev, A.Stepanov, S.Aıtbaev, O.Tańsyqbaev, B.Tábıev jáne t.b. sheberlerdiń shyǵarmalary bar.
Odan basqa, «Forte Bank Kulanshi Art Space» galereıasynda negizinen otandyq zamanaýı beıneleý óneriniń týyndylarynan turatyn banktiń tól toptamasynan alynǵan sýretter qoıylatyn bolady. Forte Bank basqarmasy tóraǵasynyń orynbasary Gýram Andronıkashvılı aıtyp ketkendeı, jańa mádenı keńistiktiń ashylý ıdeıasynyń rýhanı bastamashysy banktiń negizgi quryltaıshylarynyń biri, mesenat jáne qoǵam qaıratkeri Bolat О́temuratov bolǵan. Bank Qazaqstan mádenı murasynyń damýy men saqtalýyna ınvestısııa jasaýdy jalǵastyra bermek.
Sonymen qatar, galereıa Astana qalasynyń oqýshylary men stýdentteriniń beıneleý ónerine qyzyǵýshylyǵyn arttyrý maqsatynda elordamyzdyń bilim berý uıymdarymen tyǵyz yntymaqtastyq ornatýdy josparlap otyr.
«Forte Bank Kulanshi Art Space» galereıasynyń alǵashqy jobasy «Máńgilik mura» dep atalatyn qazaqstandyq beıneleý óneri klassıkteriniń kórmesi bolyp tabylady.
Galereıanyń saltanatty ashylý rásimine Mádenıet jáne sport mınıstri Arystanbek Muhamedıuly, Astana qalasy ákiminiń orynbasary Ermek Amanshaev, «Qulanshy» kýratorlyq keńesiniń tóraıymy Leıla Mahat, sonymen qatar, shyǵarmashylyq zııaly qaýym, bıznes, BAQ ókilderinen quralǵan kórmeniń alǵashqy kelýshileri qatysty.
«Egemen-aqparat»