Petropavl qalasynda ótken «Táýelsizdiktiń jas juldyzdary» atty forým egemendigimizdiń shırek ǵasyrlyq mereıtoıyna arnalyp, oǵan aımaq basshysy Erik Sultanov qatysty.
О́ńirdiń jańashyl, belsendi jas ókilderiniń basyn qosqan is-sharada sóılegen sózinde Erik Hamzauly jas urpaq boıyna qazaqstandyq patrıotızmdi uıalatý, salamatty ómir saltyna tárbıeleý, jumyspen qamtý memlekettik saıasattyń basym baǵyty sanalatynyn, al aǵa býynnyń jaqsy dástúrlerin jalǵastyrý, otanǵa qaltqysyz qyzmet etý olar úshin basty mindet bolyp tabylatynyn atap kórsetti. О́skeleń urpaq memlekettiń qoldaýy men qamqorlyǵyn aıryqsha sezinip otyr. Olar Elbasynyń «Erkin elde ósken urpaqtyń rýhy árdaıym bıik bolýy tıis. Jastary jalyn júrekti, órshil, namysty, bıik rýhty bolsa, ol eldiń eńsesi de bıik bolady» degen ataly sózin esten shyǵarmaıdy. «Jasyl el» baǵdarlamasy júzege asyrylǵaly óńirde 15 myńǵa jýyq adam jumysqa ornalasqan. 2146 jas «Jumyspen qamtýdyń jol kartasy-2020» jobasyna qatysqan. Eldi mekenderge joldamamen kelgen bir myńǵa jýyq mamanǵa 134 mıllıon teńge ótemaqy, 540 qatysýshyǵa 1,3 mıllıard teńge nesıe berilgen.
Forýmda etnomádenı birlestikteriniń, úkimettik emes uıymdardyń ókilderi, táýelsizdik qurdastary, «Serpin-2050», «Dıplommen – aýylǵa!» baǵdarlamalaryna qatysýshylar óz oılaryn ortaǵa salyp, áserli áńgimelermen bólisti. Qoǵamnyń ártúrli salasynda jemisti eńbek etip júrgen bir top órenge qurmet
gramotalary men alǵys hattar tabys etildi.
«Jas daryn» atalymy boıynsha Pogodın atyndaǵy orys drama teatrynyń rejısseri Tımýr Kárimjanov eń úzdik dep tanyldy. Ol atalmysh óner oshaǵynda alty jyl jumys isteıdi. Osy aralyqta kóptegen qoıylymdy sahnalap, kórermender iltıpatyna bólengen. «Jas batyr» atalymy M.Jumabaev aýdanynan kelgen Ivan Gorbalǵa buıyrdy. Otqa oranǵan úıge kirip, úsh balany qutqarýy qandaı marapatqa bolsyn laıyq. «Eń úzdik áleýmettik joba» atalymyna «Ýlybka» qaıyrymdylyq qory ıe boldy.
Pikirtalas alańynda jastar uıymdary men qozǵalystarynyń qyzmeti, «Jas kásipkerler», «Tıimdi memlekettik basqarý» taqyryptary talqyǵa salynyp, ózekti problemalar qozǵaldy.
Tuǵyrly Táýelsizdiktiń 25 jyldyǵyna arnalǵan shara Otan, el, jer týraly patrıottyq ánderge ulasty.
О́mir ESQALI,
«Egemen Qazaqstan»
Soltústik Qazaqstan oblysy