Keshe ótken Ortalyq kommýnıkasııalar qyzmetindegi brıfıngte Aýyl sharýashylyǵy mınıstrliginiń ókilderi orman-toǵaılardaǵy sanıtarlyq kesý men sýarmaly jerlerdiń aınalymǵa qaıtarylýy jáne Jer kodeksine engiziletin ózgerister men tolyqtyrýlar týraly aıtty.
Jıyn barysynda negizgi spıkerdiń biri retinde Aýyl sharýashylyǵy mınıstrligi Orman sharýashylyǵy jáne janýarlar dúnıesi komıteti tóraǵasynyń mindetin atqarýshy Qaırat Ústemirov sóz sóıledi. Ol orman qory alqaptarynda qylqan japyraqty ekpelerdi sanıtarlyq kesýge tyıym salýdyń sebep-saldaryna keńinen toqtalyp, saladaǵy qazirgi ahýaldy da baıandady. «Sońǵy ýaqytta japyraqty jáne qylqan japyraqty sharýashylyq boıynsha súrek daıyndaý kólemi orman paıdalanýshylary men orman ıeleri arasynda ıgerilmeı jatyr. Qolda bar derekterge súıensek, aǵash kesýde negizgi paıdalaný kóleminiń ıgerilmeýi orman paıdalanýshylar men orman ıeleriniń sanıtarlyq kesýdi tıimdi dep sanaıtyndyǵynda bolyp otyr», dedi Q.Ústemirov.
Mysaly, Shyǵys Qazaqstan oblysynda jyl saıyn sanıtarlyq kesý arqyly 80 myń tekshe metrge jýyq súrek daıyndalady. Al sońǵy úsh jylda Aqmola oblysyndaǵy sanıtarlyq kesý kólemi 185,3 myń tekshe metrdi qurady. Osynyń saldarynan 2004-2014 jyldar aralyǵynda ekpeler qory azaıyp qaldy.
Sanıtarlyq kesýdiń paıdaly bolýynyń sebebi – orman paıdalanýshylar súrek daıyndaý shyǵynyn azaıtý arqyly tólem somasyn da kemitpek. Bul rette olardyń tabysynyń artatyny túsinikti. Komıtet tóraǵasynyń mindetin atqarýshy qylqan japyraqty ekpelerdi sanıtarlyq kesýge tyıym salý máselesi Parlament pen Úkimet deńgeıinde talqyǵa túsip jatqanyn da jetkizdi.
Basqosýda mınıstrlikke qarasty Jer resýrstaryn basqarý komıteti tóraǵasynyń mindetin atqarýshy Gúljahan Bımendına sóz sóılep, Jer kodeksine engiziletin ózgerister men osy baǵytta qolǵa alynǵan sharalardyń barysy jáne jeke turǵyn úı qurylysy úshin on sotyq jer telimin berý máselesine aıryqsha toqtaldy. «El azamattaryn on sotyq jer telimimen qamtamasyz etýdegi basty máselelerdiń biri – eldi mekender aýmaǵynda bos jerlerdiń bolmaýy. Al buǵan deıin qamtylǵan jerlerdi alý máselesi aǵymdaǵy zańnamada qarastyrylmaǵan. Osy rette, jańa zańnamada halyq suranysyna sáıkes jeke turǵyn úı qurylysy úshin jer telimderin memlekettik qajettilikke jatqyzý qarastyrylýda», dedi G.Bımendına. Sonymen qatar, ol aýyl sharýashylyǵy maqsatyndaǵy jerlerdi paıdalanýdyń zańdylyǵyn tekserý barysynda 3 myńǵa jýyq zań buzýshylyqtardyń anyqtalǵanyn jáne ol jerlerdiń memleketke qaıtarylatynyn sóz etti.
Shara barysynda Sý resýrstary komıteti tóraǵasy Islam Ábishev sýarmaly jerlerdiń aınalymǵa qaıtarylýy týraly áńgimeledi. Onyń aıtýynsha, 2017-2021 jyldar aralyǵynda 610 myń gektar aýmaqtaǵy sýarmaly jerlerdiń ırrıgasııalyq júıelerin qaıta qalpyna keltirý kózdelýde. «Bul aýmaqtar elimizdiń 11 oblysynda ornalasqan. Qaıta qalpyna keltirý jumystaryna 326 mıllıard teńge shamasynda qarajat qajet. Qazirgi daǵdarys ýaqytynda bul, árıne, úlken soma. Sondyqtan, atalǵan máseleni halyqaralyq qarjy ortalyqtary arqyly sheshýdi josparlap otyrmyz. Bul baǵytta birshama jumystardy atqaryp ta úlgerdik, naqty sharalar sáýir-mamyr aılarynda bastalady», dedi ol.
Brıfıngte Aýyl sharýashylyǵy mınıstrligi ókilderi jýrnalısterdiń saýaldaryna jan-jaqty jaýap berdi.
Ashat RAIQUL,
«Egemen Qazaqstan»