QR Premer-Mınıstri Baqytjan Saǵyntaevtyń tóraǵalyǵymen ótkizilip jatqan Úkimet otyrysynda qarjy mınıstri Baqyt Sultanov osy jyldyń alǵashqy 9 aıynda memlekettik bıýdjettiń oryndalýynda aıtarlyqtaı jetistikke jetkenin aıtyp ótti, - dep habarlaıdy egemen.kz Premer-Mınıstrdiń resmı saıtyna silteme jasap.
Mınıstr túsimderdiń asyra oryndalǵanyn, sondaı-aq salyq ótken jyldy tutastaı alǵanda teń kólemde jınalǵanyn atap ótti.
«Shyǵyndar qazirgi kezeń úshin shyńdyq merzimine jetip ıgerildi. Shyǵynnyń jartysy áleýmettik bolyp eseptelse, taǵy tórtten bir bóligi ekonomıkalyq ósý úshin baǵyttaldy», – dedi B. Sultanov.
Sonymen qatar, mınıstrlik basshysy ekonomıkalyq turaqtylyq úshin óńirlik ekonomıka jańa transferttermen qoldaý taýyp otyrǵanyn jáne de jalpy alǵanda, jergilikti bıýdjetter nátıjeli kórsetkishke qol jetkizip otyrǵanyn málimdedi.
«Oryndaý qorytyndysy salyqtyq bıýdjet saıasatynyń ekonomıkalyq jaǵdaıǵa áseriniń oń nátıjesin kórsetedi», – dep atap ótti mınıstr.
Mınıstrdiń aıtýynsha, túsimder shamamen 1 trln teńgege (941 mlrd teńge nemese 26%-ǵa) artyq oryndaldy.
«Bul makroekonomıkalyq jaǵdaıdyń jaqsarǵanyn kórsetedi. Máselen, belsendi tólemshilerdiń qatary 7,3%-ǵa artyp, 85 myń kásiporynǵa jetti», – dedi mınıstr.
Túsimderdi asyra oryndaý bıýdjetti naqtylaýdyń negizi boldy. Jalpy, memlekettik bıýdjettiń túsimderi (transfertterdi eseptemegende) 126%-ǵa, onyń ishinde respýblıkalyq bıýdjet 131%-ǵa, al jergilikti bıýdjetter 115%-ǵa oryndaldy.