El táýelsizdiginiń shırek ǵasyrlyq mereıtoıyna oraı ótip jatqan oblystardyń elordadaǵy kúnderin Aqmola oblysy qorytyndylamaq. Arqa tórindegi aımaq qarasha aıynyń sońǵy kúnderi Astanada túrli mádenı, rýhanı jáne sporttyq sharalar, aýylsharýashylyq taýarlarynyń jármeńkesin ótkizedi.
«Qýatty óńir – qýatty Qazaqstan» aksııasynyń aıasynda bas qalaǵa at basyn burǵan oblys delegasııasy elorda turǵyndaryna aımaqtyń sońǵy 25 jyl ishinde ár salada qol jetkizgen jetistikterin pash etýge nıetti. Ol týraly oblys ákiminiń orynbasarlary keshe ortalyq kommýnıkasııalar qyzmetinde ótken brıfıngte de baıandap bergen edi.
Aqmola oblysyndaǵy óńirlik jalpy ónim kólemi sońǵy 10 jylda 11 esege ósip, 1,2 trıllıon teńgege jetipti. О́nerkásip ónimderiniń úlesi de 10 esege ulǵaıyp, 335 mıllıard teńgeni quraǵan. Oblys ákiminiń birinshi orynbasary Qadyrhan Otarovtyń aıtýynsha, oblysta sonaý keńestik kezeńde ashylǵan iri-iri jıyrma óndiris ornynyń toqsanynshy jyldardaǵy qıyn ýaqytta da, odan keıingi bolǵan daǵdarystar kezinde de jabylyp qalýyna jol berilmegen. Sonyń arqasynda búginde Aqmolanyń ekonomıkalyq áleýeti ár salany qamtıdy deýge bolady.
– Indýstrııalyq-ınnovasııalyq baǵdarlamany júzege asyrý aıasynda 174 mıllıard teńgege 70 joba iske qosyldy. Zamanaýı tehnıkamen jaraqtalǵan, óndiris barysy da, ónim sapasy da álemdik standarttarǵa saı keletin zaýyt-fabrıkalar ashyldy. Sırek kezdesetin metall konsentrattary, quıma buıymdar, polıpropılennen jasalǵan zattar, soıa maıy syndy buryn óndirilmegen jańa dúnıeler shyǵaryla bastady. Sonyń arqasynda óńdeýshi ónerkásiptiń úlesi 3 esege ulǵaıdy, – dedi Q.Otarov.
Onyń aıtýynsha, «Qazaqaltyn», «Altyntaý Kókshetaý» syndy altyn óndirýshi kásiporyndar eksportqa shyǵarylatyn ónimderdiń kólemin jyl saıyn arttyryp, oblystyń ǵana emes, respýblıkanyń metallýrgııa ónerkásibiniń damýyna serpin berýde. Atalǵan kásiporyndar 2015 jyly 20 tonna altyn óndirip, 2009 jylǵy kórsetkishti 10 esege artyǵymen oryndapty. Osylaısha, Aqmola oblysyndaǵy altyn óndirýshi kompanııalardyń úlesi respýblıka boıynsha óndirilgen ónimniń 35 paıyzyn quraǵan.
Baspasóz máslıhatynda oblys ákimdiginiń basshylyq ókilderi óńirdiń jetken jetistikterin baıandap qana qoımaı, jýrnalısterdiń saýaldaryna jaýap berdi. Sońǵy birer aıdyń ishinde Selınograd aýdany Qosshy aýylyndaǵy kóp qabatty turǵyn úılerdiń sýsyz qalǵany týraly respýblıkalyq BAQ-tar habarlaǵan bolatyn. Oblys ákiminiń orynbasary Nurlan Nurkenovtiń aıtýynsha, qazir turǵyn úılerge sý jetkizilgen. Bul másele 2017 jyldyń basynda túbegeıli sheshimin tappaq.
– Qazir 18 uńǵy qazylatyn jerde jumys bastalyp ketti. Osy uńǵylardyń arqasynda aldaǵy jyldyń birinshi toqsanynda Qosshy aýylynyń halqyn jyldyń barlyq mezgilinde sýmen qamtý máselesi sheshiledi, – dedi ol.
Osy brıfıngte aıtylǵandaı, 29-30 qarasha kúnderi «Han Shatyr» saýda, oıyn-saýyq ortalyǵynyń aldyndaǵy saýda alańynda Aqmola oblysynan ákelingen azyq-túlik taýarlarynyń jármeńkesi ótedi. Aımaqtan osy shara úshin 784 mıllıon teńgeniń 2 myń tonnadan astam taýar jetkizilipti. Sondaı-aq, jármeńkede «Baýyrsaq meıramy», «Aıran shoý» syndy oıyn-saýyq sharalary, sporttyq jarystar ótpek. Budan bólek, aptanyń sońǵy kúnderi aqmolalyq ónerpazdardyń, qalamgerlerdiń qatysýymen kórmeler, shyǵarmashylyq keshter ótedi.
Arnur ASQAR,
«Egemen Qazaqstan»