Senatta «Revızııalyq komıssııalardyń jańa memlekettik aýdıt júıesindegi qyzmeti» kún tártibi boıynsha «О́ńir» depýtattyq tobynyń otyrysy boldy, dep habarlady Parlament Senatynyń baspasóz qyzmeti.
Senat Tóraǵasynyń orynbasary Sergeı Gromov óziniń kirispe sózinde Memleket basshysy N.Á.Nazarbaevtyń bes ınstıtýttyq reformasyn iske asyrý jónindegi «100 naqty qadam» Ult josparynda jańa aýdıt pen memlekettik apparat jumysyn baǵalaý júıesin engizý kózdelgenin atap ótti.
S. Gromovtyń aıtýynsha, baqylaýdyń burynǵy júıesi memlekettik basqarýdyń tıimdiligin arttyrýdyń talaptaryna saı kelmedi, memlekettik organdar qyzmetiniń tıimdiligin táýelsiz baǵalaý bolǵan joq.
Tóraǵa orynbasary jańa zańda memlekettik aýdıt jáne qarjylyq baqylaý uǵymdaryn, onyń qaǵıdattaryn, mindetteri men quraldary aıqyndalǵanyn, burynǵy júıedegi kedergiler joıylǵanyn atap ótti.
Senator Olga Perepechına óziniń baıandamasynda «Memlekettik aýdıt jáne qarjylyq baqylaý týraly» zańdy joǵary deńgeıde iske asyrýǵa kedergi keltirip otyrǵan máseleler men osy saladaǵy zańnamany keleshekte odan ári jetildirýge jan-jaqty toqtaldy.
Senator qyzmet jáne kásibı etıka buzylǵan jaǵdaıda, dáıeksiz aýdıtorlyq esep ázirleý nemese tártip buzýshylyq derekterin jasyrý, sondaı-aq, memlekettik aýdıt jáne qarjylyq baqylaý standarttaryn birneshe márte buzý oryn alǵan bolsa, memlekettik aýdıtordyń sertıfıkatyn Ulttyq sertıfıkattaý komıssııasynan aldyrý rásimin retteıtin erejeni zańǵa engizý qajet dep sanaıdy.
Aımaqtardaǵy revızııalyq komıssııalardyń qyzmeti týraly Respýblıkalyq bıýdjettiń atqarylýyn baqylaý jónindegi esep komıtetiniń múshesi Aleksandr Gorıaınov pen Qaraǵandy oblysynyń revızııalyq komıssııasynyń tóraǵasy Serik О́teshov habardar etti. Parlament Senatynyń depýtattary Rashıt Ahmetov, Serik Aqylbaı, Tóleýbek Muqashev, Ashat Kúzekov, Bekmyrza Elamanov, sondaı-aq, oblystyq revızııa komıssııalarynyń ókilderi pikirsaıysqa qatysty.