Kelesi jyly Almaty joldarynda 1000-nan astam vıdeokamera ornatylady. Bul týraly Almaty qalasynyń ákimi Baýyrjan Baıbek, Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Alık Ishpekbaev, ákimdik, ortalyq memorgandardyń aýmaqtyq departamentteri jáne «Nur Otan» partııasy ókilderi qatysqan sybaılas jemqorlyqqa qarsy is-áreket máseleleri boıynsha ótken májiliste aıtyldy.
Osylaısha, sybaılas jemqorlyqqa jol bermeý, joldarda polıseılermen baılanysty boldyrmaý úshin 2017 jyly qala kóshelerine myńnan astam beınekamera ornatylady.
«Jemqorlyq taqyryby memleketti ǵana emes, qoǵamdy da alańdatýda. Bul kúlli eldiń problemasy. Álemde 123-shi oryndamyz. Bul jemqorlyq deńgeıi elde joǵary degendi bildiredi. Sybaılas jemqorlyqqa qarsy saıasattyń arqasynda 2014-2016 jyldary 17 satyǵa kóterildik. Sońǵy 1 jyl 9 aıda 660 laýazymdy tulǵaǵa aıyppul salyndy. Osylaısha, ótken jyly bıýdjetke 3,5 mlrd. teńge kelip tústi. Agenttik tóraǵasynyń orynbasary atap ótkendeı, kórsetilgen merzimde aıyppul tólemeıtin qyzmetshiler bas bostandyǵynan aıyrý túrinde jazaǵa tartylady. Osy kezeńde 924 memlekettik qyzmetshiniń múlki tárkilendi, 1210 - ómir boıy memlekettik qyzmette jumys isteý quqyǵynan aıyryldy», - dedi eldegi sybaılas jemqorlyq quqyq buzýshylyq statıstıkasyn jarııalaǵan A. Ishpekpaev.