Astanada 4-6 qarasha aralyǵynda ońtústik astananyń Mádenıet kúnderi ótedi, dep habarlaıdy egemen.kz Astana ákimdiginiń baspasóz qyzmetine silteme jasap.
5 qarashada «Almaty – Táýelsizdiktiń altyn besigi» mýltımedııalyq kórmesi jáne qala tarıhy murajaıynyń qorynan eksponattar usynylatyn fotokórme ashylady. Kórme ekspozısııasy Jetisý men Almatynyń sol ýaqyttan búgingi kúnge deıingi kezeńi beınelengen biregeı tarıhı fotosýretterden quralǵan. Sondaı-aq kelýshilerge qala ishimen 3D-týr usynylady. Onda megapolıstiń eń tanymal mádenı nysandary engizilgen. Kórme 2016 jyldyń 5 jeltoqsanyna deıin jalǵasady.
5 jáne 6 qarashada Q.Qýanyshbaev atyndaǵy Memlekettik akademııalyq qazaq mýzykalyq drama teatrynyń sahnasynda «Altyn Adam» epıkalyq spektakli jáne merekelik «Kýkly shoý» spektakli qoıylady. Sharany uıymdastyrýshy – Almaty qalasy mádenıet jáne muraǵattar basqarmasynyń Memlekettik qýyrshaq teatry. Sondaı-aq teatr foıesinde eki kún boıy qýyrshaqtar kórmesi ótetin bolady. 5 qarashada saǵat 15:00-de Ulttyq kitaphanada jas aqyndar Ǵalym Jaılybaı, Maraltaı Ybyraev, Qasymhan Begmanov, Janarbek Áshimjanov elorda jastarymen kezdesedi. Sharalar baǵdarlamasy 5 qarashada 18:00-de Qazaqstan Táýelsizdiginiń 25 jyldyǵyna arnalǵan «Almaty – Táýelsizdiktiń altyn besigi» atty gala-konsertpen aıaqtalady.