Aqtóbege kelgen Parlament Májilisi Ekologııa máseleleri jáne tabıǵat paıdalaný komıtetiniń tóraǵasy Gleb Shegelskıı bastaǵan bir top depýtattar «Nur Otan» partııasy oblystyq fılıalynda «Jer qoınaýy jáne jer qoınaýyn paıdalaný týraly» Kodeksiniń jobasyn talqylaý maqsatynda kóshpeli otyrys ótkizdi. Oǵan oblystyq máslıhattyń depýtattary, oblystyq mamandyrylǵan tabıǵat qorǵaý prokýratýrasynyń, jergilikti qarjy jáne quqyq qorǵaý organdarynyń, kómirsýtekti shıkizatty jáne qatty paıdaly qazbalardy óndirý salasyndaǵy kóptegen jer qoınaýyn paıdalanýshy kompanııalardyń ókilderi qatysty.
Otyrysty júrgizip otyrǵan Parlament Májilisi Ekologııa máseleleri jáne tabıǵatty paıdalaný komıtetetiniń tóraǵasy Gleb Shegelskıı depýtattar tobynyń túske deıin qalanyń ekologııasyna áser etetin iri kásiporyn «Qazhrom» AQ qarasty jańa ferroqorytpa zaýytynda, káriz – tazartý stansasynda, turmystyq qatty qaldyqtar polıgonynda bolǵandaryn, olarda qol jetken tabystarmen birge problemalar da bar ekenin atap ótti. Kóshpeli otyrys ótkizý úshin Aqtóbeniń bekerge tańdalmaǵanyn tilge tıek ete kelip, bul óńirdiń mıneraldy shıkizatqa, sonyń ishinde munaı men gazǵa, qara jáne tústi metalǵa, hromǵa baı ekenine nazar aýdardy.
Oblys ákimi Berdibek Saparbaev kóshpeli otyrysqa qatysýshylardy quttyqtap sóz sóılep, óńirdiń ekologııalyq qaýipsizdigin saqtaý boıynsha jasalyp jatqan jumystarǵa toqtala ketti.
– Bizdiń óńir úshin ekologııa máselesi óte mańyzdy. Jer asty qazba baılyqtaryn ıgerýdiń ekologııaǵa áseri de kóp bolary sózsiz. Bıyl ekologııalyq baǵdarlamalardy júzege asyrýǵa 1100 mıllıon teńge bólindi. Qatty qaldyqtardy suryptaý zaýytyn jáne jańa kárizdik tazartý stansasyn salýdy qolǵa aldyq. Sondaı-aq, qatty qaldyqtar polıgonynyń mańyn kógaldandyrý maqsatynda 103 myń túp kóshet otyrǵyzyldy. Alaýǵa jaǵylatyn gazdyń 93 paıyzy óńdeledi, taıaýdaǵy úsh jylda bul kórsetkishti 95 paıyzǵa jetkizý kózdelýde. Bul baǵyttaǵy jumys jalǵasa beredi, –dedi óńir basshysy.
Investısııa jáne damý vıse-mınıstri Tımýr Toqtybaev «Jer qoınaýy jáne jer qoınaýyn paıdalanýshylar týraly» kodeks jobasynyń erekshelikteri men tıimdiligine aıryqsha toqtaldy. Onyń sózine qaraǵanda, zań jobasy jer qoınaýyn paıdalaný jónindegi operasııalardy júrgizýde ınvestısııalar tartý úshin qolaıly jaǵdaılar jasaıdy.
Kóshpeli otyrysta sóz alǵan energetıka vıse-mınıstri Áset Maǵaýov kodeks jobasyndaǵy jer qoınaýyn ıgerýge ınvestısııa tartý, ınvestorlarlarǵa qaralǵan salyq máselesi týraly taratyp aıtyp berdi. Burynǵy bes túrli tólemnen góri jaldyq stavka belgilengeni tıimdi degen oı aıtty.
Sodan keıin olar Parlament Májilisi depýtattarynyń jáne kóshpeli otyrysqa qatysýshylardyń suraqtaryna jaýap berip, kóshpeli otyrysqa qatysýshylardyń kodeksti qabyldaý barysynda nazar aýdarý qajet degen usynystaryn qaperge aldy.
О́ńirdiń ekologııalyq jaǵdaıy týraly oblystyq ekologııa departamentiniń basshysy Jaqsyǵalı Imanqulov habarlama jasady.
Satybaldy SÁÝIRBAI,
«Egemen Qazaqstan»
Aqtóbe oblysy