Keshe Qazaqstan Respýblıkasynyń Tuńǵysh Prezıdenti – Elbasynyń kitaphanasynda «Eýrazııa geoekonomıkasy: túıisýden yntymaqtastyqqa deıin» taqyrybynda halyqaralyq konferensııa ótti.
QHR Memlekettik keńesiniń tóraǵasy Lı Kesıannyń elimizge taıaý arada josparlanyp otyrǵan resmı saparynyń qarsańynda uıymdastyrylǵan, qazaqstandyq jáne qytaılyq sarapshylar qatysqan bul sharany Qazaqstan Respýblıkasynyń Tuńǵysh Prezıdenti – Elbasynyń kitaphanasy dırektorynyń orynbasary Tımýr Shaımergenov ashyp, kirispe sóz sóıledi. Ol jıyn barysynda qarashanyń basynda Qazaqstan Premer-Mınıstri Baqytjan Saǵyntaev pen QHR Memlekettik keńesiniń tóraǵasy Lı Kesıan kezdesetinin aıta kelip, búgingi jıynnyń qazaqstandyq dıplomattarǵa paıdasy zor ekenin jetkizdi.
Budan keıin QHR Qoǵamdyq ǵylymdar akademııasy Reseı, Shyǵys Eýropa jáne Ortalyq Azııany zertteý ınstıtýty (QQǴA) dırektorynyń orynbasary Sýn Lı «Jibek joly ekonomıkalyq beldeýi jáne Eýrazııalyq ekonomıkalyq odaǵynyń Ortalyq Azııa óńirindegi túıisýiniń basty baǵyttary» taqyrybynda baıandama jasady. Sýn Lı óz sózinde Jibek joly ekonomıkalyq beldeýi aıasynda yntymaqtastyqty damytýdyń basty baǵyty retinde ınfraqurylym men energetıka salasynyń mańyzdylyǵyna toqtaldy. Sondaı-aq, ol Qytaı jaǵynyń iskerlik seriktes retinde Qazaqstanǵa qyzyǵýshylyǵy artyp otyrǵanyna nazar aýdardy.
«Qytaı – Eýrazııalyq ekonomıkalyq odaqtyń eń úlken saýda-ekonomıka salasyndaǵy seriktesi. О́tken jyly eki jaqtyń taýar aınalymynyń kólemi 78 mıllıard dollardan astam boldy», – dedi ol.
О́z kezeginde Qazaqstannyń «Jibek joly» halyqaralyq logıstıka jáne bıznes ınstıtýty Qamqorshylar keńesiniń múshesi Erhat Esqalıev «Bir beldeý – bir jol» bastamasy ekonomıkalyq ósýdiń jahandyq trend retinde. Qazaqstannyń róli» taqyrybynda habarlama jasap, elimiz ben Qytaıdyń qarym-qatynasy turǵysynda sóz qozǵady. Onyń aıtýynsha, Qazaqstan «Jibek joly» tranzıttik jobasy boıynsha barynsha sapaly servıs jasaǵany abzal.
«Qazirgi tańda Qazaqstan men Qytaıdyń ózara qarym-qatynastary qarqyndy damyp keledi. Naqty jobalar bar. Bul jobalar taraptardyń saýda-ekonomıkalyq baılanystaryna tikeleı baılanysty.
Qazaqstan Eýropa, Reseı jáne Qytaı memleketteriniń ekonomıkalyq qatynastarynda mańyzdy ról atqarady. Bizdiń elimizdiń tranzıttik áleýeti zor. Bul Qazaqstan aýmaǵy arqyly ótkiziletin taýarlardyń kólemin eselep arttyrýǵa múmkindik beredi», – dedi E. Esqalıev.
Odan ári ol «Nurly jol» baǵdarlamasy aıasynda atqarylyp otyrǵan kóptegen sharalar Qazaqstannyń saýda-ekonomıka salasyndaǵy áleýetin ósire túskenin sóz etti. Onyń aıtýynsha, Qazaqstan óziniń ekonomıkalyq kúsh-qýatyn arttyra túsý úshin ınfraqurylym sapasyna, keden beketterin uıymdastyrýǵa, kólik-logıstıka salasynyń qyzmetin jetildire túsýge basa nazar aýdarýyn kún tártibinen túsirmeýi tıis.
Jıynda Qytaı Qoǵamdyq ǵylymdar akademııasy «Bir beldeý – bir jol» ortalyǵy basshysynyń orynbasary Chjan Nın Qytaı men Eýrazııalyq ekonomıkalyq odaq arasyndaǵy ekonomıkalyq aımaq qurýdyń múmkindikteri jóninde sóz etti. Onyń aıtýynsha, ekijaqty qarym-qatynastardyń teń dárejede júrýine jiti kóńil bólý taraptardyń ózara yntymaqtastyǵyn damyta túsedi.
Al Qytaı Qoǵamdyq ǵylymdar akademııasy Reseı saıasaty jáne QQǴA qoǵamy bóliminiń basshysy Pan Dapen Eýrazııalyq ekonomıkalyq odaq pen Jibek joly ekonomıkalyq beldeýi arasyndaǵy yntymaqtastyqtyń óristeýi kóptegen múmkindikterge jol ashatynyn jetkizdi.
Sonymen birge, konferensııa barysynda qatysýshylar qarastyrylǵan taqyryp tóńireginde pikir almasty. Olardyń sózderine qaraǵanda, Qazaqstan men Qytaı arasyndaǵy saýda-ekonomıkalyq baılanystar eki eldiń ózara yntymaqtastyǵyn odan ári nyǵaıta túsedi.
Joldybaı BAZAR,
«Egemen Qazaqstan»